भूमि आयोगपाखें दलीय नेता व सरोकारवालालिसे सहलह

येँ(नेपालभाषा टाइम्स)÷भूमि आयोग येँ जिल्ला समितिं मन्त्री, राजनीतिक दलया नेता व सरोकारवाला निकायलिसे सहलह ब्याकूगु दु । आयोगया येँ जिल्ला समितिं सुकुम्वासी समस्यायात कयाः नेपाल सरकारया मन्त्री, राजनीतिक दलया शीर्ष नेता व सरोकारवाला निकायया पदाधिकारीलिसे सहलह ब्याकूगु खः ।

समितिया नायः श्यामकृष्ण प्रजापतिसहितया पुचलं छुं दिं न्ह्यः जक नेपाली कांग्रेसया नेतालिसें येँ १ नं क्षेत्रपाखें नवनिर्वाचित प्रतिनिधिसभा सदस्य प्रकाशमान सिंहयात नाप लानाः सहलह ब्याकूगु दु । उगु इलय् समितिया नायः प्रजापतिं सुकुम्वासी समस्या समाधानया निंतिं आयोगं यानाच्वंग ज्या व भावी योजनाया बारे जानकारी याकूगु खः । नेता सिंहं नं सुकुम्वासी समस्या समाधान व व्यवस्थापनया निंतिं थः व थःगु पार्टीपाखें फक्व ग्वाहालि यायेगु प्रतिवद्धता प्वंकादीगु खः ।

थुकथं हे आयोगया येँ जिल्ला समितिं येँ महानगरपालिकाया प्रवक्तालिसें १७ वडाअध्यक्ष नविन मानन्धरयात नाप लानाः सहलह ब्याकूगु दु । उगु इलय् समितिं महानगर प्रवक्ता मानन्धरयात सुकुम्वासी समस्या समाधानया निंतिं आयोगलिसे समन्वय व सहकार्य यायेत इनाप यानादीगु खः ।

अथे हे समितिं सुकुम्वासी समस्या समाधानया निंतिं भूमि व्यवस्था, सहकारी तथा गरिबी निवारण मन्त्री शशी श्रेष्ठयात नाप लानाः सहलह ब्याकूगु खः । थुकथं हे समितिं संस्कृति, पर्यटन व नागरिक उड्डयन मन्त्री जीवनराम श्रेष्ठयात नं नाप लानाः सहलह ब्याकूगु दु ।

थुकिया नापं समितिं अधिकार सम्पन्न बागमति सभ्यता एकीकृत विकास योजनाया पदाधिकारीपिंत नं नाप लानाः सहलह ब्याकूगु दु । समितिं योजनया अध्यक्ष उद्धव तिमिल्सिना, उपाध्यक्षलिसें योजना प्रमुख वीरेन्द्र थपलियालिसें दुजःपिंत नाप लानाः सहलह ब्याकूगु खः ।

उगु इलय् समितिया दुजःपिं मोतिलाल लामा, सुशिला खतिवडालिसें समितिया विज्ञ सदस्य योगेश पौडेल, येँ जिल्लाया नापी अधिकृतलिसें समितिया सदस्य सचिव शिव लम्सालया नं उपस्थिति दुगु खः ।

नेपालभाषा टाइम्स

च्वमिया मेमेगु

• ‘नुगः चफुना’ या म्यूजिक भिडियो पिदन
• नेपालभाषाया न्हूगु श्रृंखला वइगु
• एनपिएल ः जनकपुर व चितवन त्यात
• बौद्धविद्वान प्रजापतिया हना
• प्रधानमन्त्री ओलीया चीन भ्रमण, छुं न्हूगु सम्झौता मजुइगु