सामाखुसिइ न्हूगु विहार उलेज्या

येँ(नेपालभाषा टाइम्स)- थनया सामाखुसिइ न्हू दयेकूगु धम्म मोलि विहारया उलेज्या याःगु दु । येँ महानगरपालिका २६ वडा सामाखुसिइ निर्माण याःगु विहार उलेज्याया झ्वलय् भिक्षु महासंघपाखें महापरित्राण पाठ नं यानाबिज्याःगु खः ।

श्रद्धेय धम्म विजया गुरुमानं लसकुस याना बिज्याःगु विहार उलेज्याया झ्वलय् श्रद्धेय अनागारिका धम्मवती गुरुमां व भिक्षु राहुल महास्थविरं विहारय् पलिस्था याःगु बुद्ध मूर्तिया मंकाःकथं अनावरण यानाबिज्याःगु खः । अथे हे विहारया कःसिइ पलिस्था यानातःगु चैत्यया भिक्षु गणपाखें पाठ यासे उलेज्या याना बिज्याःगु खः । उगु इलय् अखिल नेपाल भिक्षु महासंघया भिक्षु गणपाखें महापरित्राण पाठ याना बिज्याःगु खः ।

भिक्षु राहुल महास्थविरं पंचशील बियाबिज्याःगु ज्याझ्वलय् भिक्षु कोण्डन्य महास्थविरं धर्मदेशना बियाबिज्यासे विहार निर्माणया महत्वयात कयाः व भिक्षु धम्ममूर्ति महास्थविरं नवनिर्मित विहारया बारे जानकारी बियाबिज्याःगु खःसा स्वयम्भूरत्न तुलाधरं नं नुगःखँ तयादीगु खः ।

बर्मी भिक्षुणी दो मोलिनीं सुभाय् देछाना बिज्याःगु ज्याझ्वलय् उपस्थित उपासक उपासिकापाखें दान प्रदानया ज्याझ्वः नं जूगु खः । ज्याझ्वलय् अखिल नेपाल भिक्षु महासंघया अध्यक्ष श्रद्धेय भिक्षु धम्मशोभन महास्थविर, भिक्षु नन्द महास्थविर, भिक्षु शान्त सिद्धार्थ लिसें आपालं भिक्षु, अनागारिका गुरुमांलिसें उपासक उपासिकापिनिगु उपस्थिति दुगु खः ।

पुलांगु विहार पुनःनिर्माण यायेगु ज्या जुया वयाच्वंगु इलय् न्हूगु वस्तीइ थुकथंया विहार निर्माण यायेगु ज्यां बुद्ध धर्मप्रति आस्था अप्वयेकेत तिबः जुइगु विश्वास याःगु दु । बर्माया गुरुमां श्रद्धेय दो मोलिनी व स्वयम्भूया किम्द्वःस्थित निर्वाणमूर्ति विहारया श्रद्धेय गुरुमां डा. धम्म विजययाया सक्रियताय् उगु विहार निर्माण याःगु खः ।