जोरविजोर प्रणाली नं चीकल

येँ – स्वनिगलय् निजी व सार्वजनिक सवारी साधनय् तयातःगु जोरविजोर प्रणाली चीकूगु दु । स्वनिगःया स्वंगुलिं जिल्लाया सीडीओतय् मंकाः मुँज्यां कन्हसंनिसें सवारी साधनया जोरविजोर प्रणाली चीकेगु निर्णय याःगु खः ।

उकथं हे बैठकं स्वनिगलय् परीक्षा सञ्चालन याके बीगु निर्णय नं याःगु दु । छगू परीक्षा हलय् नीन्याम्ह स्वयां अप्वः तये मदइगु कथं परीक्षा सञ्चालन याके बीत्यंगु खः । अप्वः विद्यार्थी तयेमाःगु अवस्था जुल धाःसा निगू सिफ्टय् सञ्चालन यायेत नं निर्देशन बिउगु दु ।

परीक्षा सञ्चालनया झ्वलय् जनस्वास्थ्य मापदण्ड पालना यायेमाःगु खँ धाःगु दु । परीक्षाया झ्वलय् मास्क, स्यानिटाजर अनिवार्य रुपं छ्यलेमाःगु, छगू सिफ्टया परीक्षा क्वचायेवं निसंक्रमण यायेमाःगु खँ धाःगु दु ।