मोडेल स्कुलय् हुलाप्याखं कासा

येँ – काठमाडौं मोडेल स्कुलया थीथी तगिमय् ब्वनाच्वंपिं विद्यार्थीतय् दथुइ ‘काठमाडौं मोडेल याकः हुलाप्याखं कासा–२०१८’ जुल । स्कुलय् थीथी तगिमय् ब्वनाच्वंपिं विद्यार्थी दथुइ जुनियर व सिनियर यानाः निगू पुचलय् उगु कासा जूगु खः ।न्हापांगु चरणय् अडिसनं ल्यःपिं झिंच्याम्ह विद्यार्थी दथुइ उगु कासा जूगु खः । कासाय् जुनियरपाखे स्वंगूनिसें न्यागू तगिं तकया झिम्ह विद्यार्थीं ब्वति काःगु खःसा सिनियरपाखे खुगूनिसें गुंगू तगिं तकया च्याम्ह विद्यार्थीं ब्वति काःगु खः । कासाय् जुनियरपाखे दृष्टि महर्जन, आरुषा महर्जन व भूमिका सेढाइँ न्हाप, लिउ व लियांलिउ लाःगु खःसा सिनियरपाखे सिम्रन महर्जन न्हाप, रोशी दर्जी लिउ व रितिशा महर्जन लियांलिउ लाःगु खः । स्कुलया प्रिन्सिपल राजेन्द्र महर्जनया सभापतित्वय् जूगु कासाय उलेज्या वय्कलं हे यानादीगु खः कासाया निर्णायकमण्डलय् सुदन मुनिका व रिना महर्जन च्वनादीगु खः । कासाय् विजयी जूपिं विद्यार्थीपिंत प्रिन्सिपल शील्ड, निर्णाणयमण्डलया दुजःपिंसं दसिपौ व सिरपाः लःल्हानानादीगु खःसा निर्णायकमण्डलया दुजः ग्वाहालि यानादीपिंत प्रिन्सिपलपाखे मतिनाया चिं लःल्हाःगु खः ।