‘साहित्य नं राजनीति थें वर्गीय जुइ’

किपू – जन साहित्य पांगा किपूया ग्वसालय् वंगु छुं दिं न्ह्यः नेपालभाषा साहित्य सम्मेलन जुल । स्थानीय ज्येष्ठ नागरिकलिसें पुलांम्ह कम्युनिष्ट न्ह्यलुवा इन्द्रमान महर्जनं त्वाःदेवाय् मत च्याकाः उलेज्या यानादीगु ज्याझ्वः च्वमि लिसें साहित्यकार रामचन्द्र महर्जनया सभापतित्वय् जूगु खः । ज्याझ्वःया मूपाहां नेपाल मजदुर किसान पार्टीया सचिव नापं प्रतिनिधिसभा सदस्य प्रेम सुवालं साहित्य नं राजनीति थें हे वर्गीय जुइ धासें कामदार वर्गया हित व उत्थानया निंतिं च्वइगु साहित्य माक्र्सवादी साहित्य जुइगु व माक्र्सवादी साहित्ययात न्ह्यःने यंकेत थज्याःगु सम्मेलन जुयाच्वनेमाः धइगु खँय् बः बियादिल ।

सर्वदलीय बैठकय् प्रदेशसभाया प्रमुख व राजधानी क्वःछीत सरकारयात सहमति बिउगु व सरकारं नं व हे कथं निर्णय याःबलय् एमालेया नेता व कार्यकर्तात अराजनीतिक क्रियाकलापय् कुहां वयेगु धइगु थ्व इमिगु दोहोर चरित्र जूगु वय्कलं धयादिल । नेपाल क्रान्तिकारी सांस्कृतिक संघया केन्द्रीय अध्यक्ष नापं प्रदेशसभा सदस्य सुरेन्द्रराज गोसाईं नं क्रान्तिकारीतय्सं च्वयेगु शुरु मयाःतले क्रान्तिकारी साहित्यया जन्म जुइमखु धइगु चर्चा यासें साहित्य बहुसंख्यक शोषित पीडित जनताया मुक्तिया निंतिं जुइमाः धयादिल ।

प्रा. डा. रामकृष्ण महर्जन, प्राचार्य नन्दकुमारी महर्जन, जनगायक रामकृष्ण दुवाल, नेमकिपाया केन्द्रीय दुजःपिं सनकमान महर्जन, राजवीर डंगोल, नारायण महर्जन, हरिकुमार महर्जनपिंसं नं साहित्यया थीथी पक्षयात कयाः थःथःगु नुगःखँ तयादीगु ज्याझ्वलय् प्रतियोगितात्मक चिनाखँ कासाय् रामशरण महर्जन (लिच्वःया सवाः) न्हाप, मदन श्रेष्ठ (देय्या दुने नं मि च्याकीगु हे जुल) लिउ व नरमान महर्जन (गथे जुइन थ्व देय्) लियांलिउ लाःगु खःसा सुवर्ण महर्जन व विनिश्का महर्जनं हःपाः सिरपाः त्याकादीगु खः । वय्कःपिंत मूपाहां सांसद सुवालं सिरपाः लःल्हानादीगु खः ।