ठाकुर पक्षयात मन्त्री बीत देउवा अनिच्छुक

येँ – जसपाया महन्थ ठाकुर पक्षयात सरकारय् दुथ्याकेगु बारे प्रधानमन्त्री शेरबहादुर देउवां आः तक छुं कुतः मयाःनिगु खँ सीदुगु दु । उपेन्द्र यादव पक्षयात सरकारय् दुथ्याकेगु तयारी जुयाच्वंसां ठाकुर पक्षयात सरकारय् दुथ्याकेत प्रम देउवा लिचिलाच्वंगु खँ सूत्रं धाःगु दु ।

ठाकुर पक्षं थ्व स्वयां न्ह्यः ओली सरकारयात समर्थन यानाः झिंछम्ह तक मन्त्री नं जुइधुंकूगुलिं आः थःगु मन्त्रिमण्डलय् ठाकुर पक्षयात थाय् बीत देउवा इच्छुक मजुयाच्वंगु खँ धाःगु दु । सूत्रया कथं यादव पक्षयात तंचायेकाः ठाकुर पक्षयात सरकारय् हयेगु घातक पलाः जुइ फइगु अनुमान देउवां यानाच्वंगु दु ।

सूत्रं धाः कथं स्वयम् ठाकुर खेमाय् नं सरकराय् वने जिउ लाकि मजिउ धइगु खँय् छगू हे निर्णय जुइ फयाच्वंगु मदुनि । उगु खेमा दुने गुलिं सरकारय् वनेमाः धाइपिं दुसा गुलिं धाःसा थःपिनिगु माग पूमवंतले सरकारय् वने मजिउ धइगु लाइनय् नं थ्यनाच्वंगु दु ।

सरकारय् वनेमाः धइगु पक्षं आः सरकारं याइगु गुगुं नं कथंया जस अपजसया भागिदार थःपिं नं जुइगु जुयाः सरकारय् वनेमाः धायेगु यानाच्वंगु दुसा मेगु पक्षं धाःसा प्रधानमन्त्रीपाखें आः तक सरकारय् वा धकाः छुं नं कथंया प्रस्ताव हे छ्वया महःनिगु कारणं सरकारय् वने मजिउगु खँ धायेगु यानाच्वंगु दु ।

थ्वहे झ्वलय् ठाकुर पक्षं संविधान संशोधन व रेशम चौधरीलिसे नेता कार्यकर्ताया रिहाइया मागयात सम्बोधन यायेत सरकारया ध्यानाकर्षण याःगु दु । वंगु साउन ३ गते ठाकुर पक्षं नं प्रम देउवायात मत बिउगु खः । उगु इलय् प्रम देउवां ठाकुर पक्षया मागयात सम्बोधन यायेगु धकाः पौ च्वःगु खःसा ठाकुर पक्षया कार्यकारिणी समितिया बैठकं मुद्दायात सम्बोधन यायेमाः धासें प्रम देउवायात ध्यानाकर्षण याकूगु खः । ठाकुर पक्षं संविधान संशोधन, मधेश आन्दोलनया मुद्दा लित कायेमाःगु, कार्यकर्ता त्वःतेमाःगु लिसें लाल आयोगया प्रतिवेदन सार्वजनिक यायेमाःगु, नागरिकता सम्बन्धी समस्या ज्यंकेमाःगु आदि माग न्ह्यःने तयातःगु दु ।

उखे जसपाया यादव पक्षं सु सु मन्त्री जुइ धइगु खँया निर्णय कार्यदलं याइ धाःगु दु । उकिया लागिं कार्यदलं तयारी यानाच्वंगु दु ।

सम्बन्धित बुखँ

LEAVE YOUR COMMENTS