विश्व नेवाः दिवसय् एकेदमिया सफू ब्वज्या

किपू – नेपालभाषा एकेदमिया ग्वसालय् थ्व हे वइगु चौलाथ्व त्रयोदशि, विहीवाःनिसें स्वन्हुयंकं सफू ब्वज्या जुइगु जूगु दु । वल्र्ड नेवाः अर्गनाइजेसन (डब्लुएनओ)या ग्वसालय् वइगु चौलाथ्व चतुर्दशि व पुन्हि निन्हुयंकं जुइगु ‘विश्व नेवाः दिवस’या लसताय् लाकाः एकेदमिं उगु सफू ब्वज्या यायेत्यंगु खः । एकेदमिया सदस्य सचिव मल्ल के. सुन्दरं बियादीगु जानकारीकथं न्हापांगु न्हिकुन्हु सनिलय् उलेज्या जुइगु व वयां लिपा निन्हुयंकं सफू ब्वज्या जुइ । सफू ब्वज्या ताःलाकेया निंतिं एकेदमिया प्राज्ञ दुजःपिं प्रा. प्रेमशान्ति तुलाधर व विजयरत्न असंबरेया संयोजकत्वय् छगू उपसमिति नं गठन याःगु दु ।उगु सफू ब्वज्या विश्व नेवाः दिवसया मू ज्याझ्वः जुइगु थाय् नेपाः ब्यांक्वेटय् जुइ । सफू ब्वज्याया उलेज्या डब्लुएनओया नायः सिजन श्रेष्ठं यानादी । शुक्रवाः व शनिवाः निन्हुयंकं सुथसिया १० ताःइलंनिसें सनिलया ५ ताःईतक सफू ब्वज्या जुइ ।

नेपालभाषाया पुलांगु, मूवंगु नापं न्हू न्हूगु नं सफू नं दइगु ब्वज्याय् नेपाल लोक साहित्य परिषद, साहित्य मन्दिर ख्वप, नागार्जुन पब्लिकेशन, कुतः पिकाकः, बसन्त महर्जनया इन्साइट पब्लिकेशन, नेवाः जागरण मञ्च, लोटस रिसर्च सेन्टर, नेपालभाषा केन्द्रिय विभाग, न्हू हिसु पुचः, धर्मकीर्ति विहार श्रीघः व सुखावति मल्टि प्रोडक्शन, साहित्यकार नजरराम महर्जन व संकिपाकमि बासु शाहीया संकिपा व म्येँया नीगू स्वयां अप्वः स्टल दइगु एकेदमिं जानकारी बिउगु दु ।