शंखधर साख्वाःया नामं राष्ट्रिय पुरस्कार

थिमि (नेपालभाषा टाइम्स)- सरकारं नेपाल संवत्या प्रवर्तक शंखधर साख्वाःया नामं राष्ट्रिय पुरस्कार नीस्वनीगु जूगु दु । संस्कृति, पर्यटन तथा नागरिक उड्डयन मन्त्रालयं शंखधरया नामं राष्ट्रिय पुरस्कार नीस्वनेत्यंगु खः ।

नेवाः देय् दबूया ग्वसालय् जूगु हनाज्याझ्वलय् नवासें संस्कृति, पर्यटन तथा नागरिक उड्डयन मन्त्री जीवनराम श्रेष्ठं थःगु कार्यकालय् भाषा, साहित्यया ख्यलय् राष्ट्रया निंतिं विशेष योगदान बियादीपिनिगु नाम राष्ट्रिय पुरस्कार स्वनेगु ल्याखं राष्ट्रिय विभूतितकं घोषणा यानातःम्ह नेपाल संवत्या प्रणेता शंखधर साख्वाःया नामं राष्ट्रिय पुरस्कार नीस्वनेगु निंतिं दक्वं ज्या न्ह्यायेधुंकूगु जानकारी बियादिल ।

शंखधरया नामं राष्ट्रिय पुरस्कारया स्थापनां झीगु आन्दोलनयात तिबः बीगु नापं थप उत्साह ब्वलनीगु आशा नं वय्कलं यानादीगु दु ।
संघीय मामिला तथा सामान्य प्रशासन मन्त्री राजेन्द्रप्रसाद श्रेष्ठं पहिचानया आन्दोलनय् न्ह्याः वनेगु पे्ररणा झी हे अग्रजतय् कारणं चूलाःगु खः धयादिल । वय्कलं पं. निष्ठानन्द, सिद्धिदास, योगवीर सिंह, जगतसुन्दर, धर्मादित्यलिसें दुर्गालाल, माणिकलाल, पद्मरत्न मल्ल के. सुन्दर थेंज्याःपिनिगु पे्ररणां हे हे थःत पहिचानया पक्षय् वनेत हःपाः दुगुु खः धयादिल ।

‘संघीय लोकतान्त्रिक गणतन्त्रयात संस्थागत यायेगु ज्या सफल जूसां झीगु चाहनाकथंया संघीयता अझं वःगु मदुनि’ मन्त्री श्रेष्ठं धयादिल । पहिचान सहितया संघीयतायात सशक्त रुपं संस्थागत याना यंकेत अन्तर्राष्ट्रियस्तरया संरचना दयेकेमाःगु आवश्यक दु धासें संघीय मामिला प्रशिक्षण प्रतिष्ठान चायेकाः अन्तर्राष्ट्रियस्तरय् संघीयताया अनुभव कालबिल यायेगु निंतिं कुतः यानाच्वनागु दु धयादिल ।

येँ महानगरपालिकाया उपप्रमुख सुनिता डंगोल, जात्रा, नखःचखः, कला, संस्कृति, सम्पदाया खँ वइबलय् जक नेवाःत न्ह्यःने लाइगु तर अधिकार कायेगु व थासय् थ्यंकेगु ज्याय् धाःसा न्ह्याबलें लिउने लानाच्वंगु दु धासें आः झीसं थुवाः जुयाः न्ह्यःने वनेगु खः वा न्ह्याबलें पिवाः हे जक जुयाच्वनेगु धइगु खँय् विचाः याये लिबायेधुंकल धयादिल ।

राजनीतिइ वइपिंत फुसा ग्वाहालि यायेत मखुसा तुति सालेगु प्रवृत्ति त्वःतेत इनाप यासें वइगु दिनय् देय् थुवाः धायेकाच्वनापिं झीगु अवस्था छु जुइ विचाः तसकं लिबायेधुंकल धयादिल ।

मूपाहांकथं झायादीम्ह नेवाः देय् दबूया संरक्षकलिसें नेवाः न्ह्यलुवा मल्ल के. सुन्दरं देय् दबू न्हूगु संरचनाय् वनेधुंकाः आः वहे कथं संस्थायात न्ह्यःने यंकेगु नापं ‘चेन अफ कमान्ण्ड’या दबूयात न्ह्याकेमाःगु आवश्यक जूगु विचाः तयादिल ।

देय् दबूया नायः पवित्र वज्राचार्यया सभापतित्वय् वय्कलं हे लसकुस यासें न्ह्याःगु ज्याझ्वलय् देय् दबूया सल्लाहकार तकं जुयादीपिं मन्त्रीद्वयलिसें देय् दबूया कचा संगठन नेवाः ल्याय्म्ह दबूया मूछ्याञ्जे सुनिता डंगोल येँ महानगरया उपप्रमुखय् निर्वाचित जुयादीगुलिं हनेज्या याःगु खः ।
ज्याझ्वलय् प्रा. डा. गीताभक्त जोशी, डा. महेशमान श्रेष्ठ, प्रा. डा. त्रिरत्न मानन्धर, डा. पुष्पराज राजकर्णिकार, त्रिरत्न शाक्यं, तीर्थराम डंगोल, सुवर्णकेशरी चित्रकार, मुक्ति प्रधान, राजेन्द्र मल्ल, दिनेश श्रेष्ठ लगायतयात सल्लाहकार पौ लःल्हाःगु खः ।

सम्बन्धित बुखँ

LEAVE YOUR COMMENTS