ने. सं. ११४३ चौलाथ्व पारू -

श्रेष्ठ तिपूया निगू सफूयात कयाः समालोचकीय परिचर्चा

ये- नेपालभाषाया निम्ह च्वमिया निगू सफूयात कयाः समालोचकीय परिचर्चा ज्याझ्वः जुल । नेवाः विद्यार्थी युनियनया ग्वसालय् भर्चुअल माध्यमं उगु ज्याझ्वः जूगु खः ।
डा. बालगोपाल श्रेष्ठया ‘डायरीया पानाय् बुया वःगु कविता’ व वय्कःया जहान श्रीलक्ष्मी श्रेष्ठया ‘सछिदँया सत्यमोहन जोशी’ नांया निगू सफूयात कयाः उगु समालोचकीय परिचर्चा ज्याझ्वः जूगु खः ।

वाङ्मत शताब्दीपुरुष डा. सत्यमोहन जोशीं नेपालभाषा काव्य इतिहासयात कयाः नुगः खँ प्वंकादिसें सफूया च्वमिपिंत निरन्तर रुपं थःगु च्वसा न्ह्याका च्वने फयेमा धकाः भिंतुना बियादीगु खः ।

कुतः पिकाकःया विमल ताम्राकारं श्रीलक्ष्मीया सफूयात महत्वयात कयाः जानकारी बियादीगु ज्याझ्वलय् डा. श्रेष्ठयात सफूयात कयाः समालेचकपिं पूर्णकाजी ताम्राकारं सफूया वैचारिकता, ध्रुव मधिकःमिं सफूया सन्दर्भ व डा. ज्योतिप्रभा तुलाधरं सफूतिइ थम्हं खंगु विषययात कयाः समालोचना यानादीगु खः ।

ह्याउँनिभाः टाइम्सया संयोजनय् युनियनया नायः रिदेन महर्जनं लसकुस यासें न्ह्याःगु ज्याझ्वलय् ह्याउँनिभाः पुचःया नायः धनबहादुर महर्जनं नेपालभाषा साहित्यलिसें थौंया इलय् नेवाः समाज लगानी व नेवाः बजाः विस्तार यायेगु ज्याय् केन्द्रीत जुयाः न्ह्याः वनेमाःगु विचाः तयादीगु खः ।

सफूलिसे स्वापू दुपिं व्यक्तित्वपिं नांजाःम्ह समालोचकलिसें कोशकार इन्द्र माली, मस्कोय् च्वनाः नेवाः साहित्ययात च्वन्ह्याकेगु ज्याय् सक्रिय जुयाच्वनादीम्ह अनुवादक कृष्णप्रकाश श्रेष्ठ व समालोचकलिसें च्वमि माधवलाल प्रधानप्रति श्रद्धाञ्जली देछासें न्ह्याःगु ज्याझ्वलय् सफूया च्वमिपिं श्रेष्ठद्वयं नं थःथःगु नुगःखँ तयादीगु खः ।