पत्रकार दबूया नायः पदय् नृपेन्द्रलाल श्रेष्ठ वइगु पक्का

येँ (नेपालभाषा टाइम्स)÷ नेवाः पत्रकार राष्ट्रिय दबूया प्यक्वःगु तःमुँज्याया झ्वलय् उम्मेदवारी दर्ता यायेगु ज्या म्हिगः क्वचाल । थुगुसी पत्रकार दबुलिं तःमुँज्या स्वयां छवाः न्ह्यः हे न्हूगु नेतृत्व चयनया ज्या क्वचायेकेगु ताः तयाः म्हिगः हे उम्मेदवारी दर्ता क्वचायेकूगु खः । थुकी नायः पदय् नृपेन्द्रलाल श्रेष्ठ याकःचिया जक उम्मेदवारी लाःगु खः ।

अथेहे मिसा उपाध्यक्ष पदय् बाहेक मेमेगु पदय् नं याकःयाकःचिया हे उम्मेदवारी लाःगु खँ धाःगु दु । निर्वाचन कमिटीं सार्वजनिक याःगु उम्मेदवारीया नां धलः कथं मिसा उपाध्यक्षय् रचना श्रेष्ठ व प्रेरणा शाक्यया उम्मेदवारी लाःगु खः ।

वरिष्ठ उपाध्यक्षय् सुनिल महर्जन, उपाध्यक्षय् सुरेन्द्रभक्त श्रेष्ठ, स्वनिगः पिनेया उपाध्यक्ष सन्दिप श्रेष्ठं उम्मेदवारी बिउगु दु । अथेहे महासचिवय् केके मानन्धर, सचिवय् राजु नापित, कोषाध्यक्षय् बाबुकाजी साँछे श्रेष्ठ, सहसचिवय् प्रजित शाक्य, मिसा सहसचिवय् सुनिता डंगोल, स्वनगिः पिने सचिवय् विजयराम कर्माचार्य व सहकोषाध्यक्ष तेजनारायण महर्जनपिंसं उम्मेदवारी बिउगु दुसा केन्द्रीय सदस्यय् स्वनिगः पाखें पूर्ण दुवाल, रत्नकाजी श्रेष्ठ, मीना वज्राचार्य, दानदास श्रेष्ठ, अनुप प्रधान व अनिता डंगोल, गण्डकी प्रदेश पाखें सदस्यय् उत्तम श्रेष्ठ व लेखा समिति संयोजकय् विगेन तुलाधरं उम्मेदवारी बिउगु खः । थुपिं पदय् नं याकःयाकः उम्मेदवारी लाःगुलिं वइगु पुस २३ गते शनिवाः जुइगु तःमुँज्या लिपा न्हूगु कार्यसमितिइ थुपिं हे वइगु जूगु दु ।

सम्बन्धित बुखँ

LEAVE YOUR COMMENTS