ने. सं. ११४४ कौलाथ्व पारू - नःलास्वनेगु

हरेक निकायय् पितृसत्तात्मक सोच हावी

येँ – राष्ट्रिय महिला आयोगया अध्यक्ष कमला पराजुलीं नेपाःया हरेक ख्यलय् पितुसत्तात्मक सोच दुगुलिं हे मिसा हिंसा न्यूनीकरणय् चुनौति थप जुयाच्वंगु खँ धयादीगु दु । वय्कलं पितृसत्तात्मक सोच मिजंतय्के जक मखसे राज्यया थीथी संयन्त्रय् नं दयाच्वंगुलिं थुकियात अन्त्य यायेत सकलें जागृत जुइमाःगु आवश्यक दु धयादिल ।

नेवाः पत्रकार राष्ट्रिय दबू मिसा कवःपाखें १११ क्वःगु अन्तर्राष्ट्रिय श्रमिक मिसा दिवसया लसताय् ग्वसाः ग्वःगु ‘मिसा हिंाि न्यूनीकरणय् पत्रकारतय् भूमिका’ विषयक अन्तक्र्रिया ज्याझ्वलय् नवासें वय्कलं उगु खँ धयादीगु खः । वय्कलं धयादिल, ‘राष्ट्र संघं थौंया दिंयात मिसा दिवस धाःसां नं थुकिया शुरुवात यायेगु खःसा श्रमिक मिसातय्त समान पारिश्रमिक बीमाःगु माग यासें सकलें मिसात श्रमिक जूगुलिं नं श्रमिक मिसा दिवस धायेगु उपयुक्त जुइ ।’

ज्याझ्वःया मू वक्ता सिविन नेपालया कार्यकारी निर्देशक सुम्मिना तुलाधरं मिसा व मिसामस्तय्सं फये मालाच्वंगु हिंसाया घटना सम्बन्धय् थःगु नुगःखँ तयादीगु खःसा मानव अधिकारया निंतिं एकल मिसा समूहया अध्यक्षलिसें राष्ट्रिय महिला आयोगया दुजः लिलि थापां न्ह्याथेंज्याःगु नीति नियम व सोचय् हिउपाः वःसां उकियात न्यंकभनं खँ न्यंकेत स्वइपिंसं थाय् काइगु तर मिसा सशक्तिकरणया थीथी मुद्दां अझ नं संचारमाध्यमय् अपाय्सकं थाय् काये मफयाच्वंगु खँ धयादिल ।

मानव अधिकारया निंतिं एकल मिसा समूहया अध्यक्ष कुन्ता शर्मां नेपाल सरकारया थीथी प्रावधानत लक्षित समूहतक सूचना थ्यने फयाच्वंगु मदु धासें अभियानया उपलब्धिमध्ये थीथी संयन्त्रय् मिसम समावेशीकरणया अभ्यास जूसां अज्याःगु हे थासय् मिसातय्सं थःगु सः तये फयाच्वंगु मदु धयादिल ।

ज्याझ्वलय् मिसा हिंसा न्यूनीकरणया निंतिं क्रियाशील पत्रकारपिं मीरा (उषा) लोहनी, लक्ष्मी पुन व सम्झना महर्जनलिसें समाजसेवी गीता गुरुङयात दोसल्लां न्ययेकाः हनापौ लःल्हासें सम्मान नं याःगु खः ।

केन्द्रीय उपाध्यक्ष रचना श्रेष्ठया सभापतित्वय् जूगु ज्याझ्वलय् दबूया केन्द्रीय नायः सुरजवीर वज्राचार्य, दबूया येँ जिल्लाया दुजःलिसें स्वास्थ्यकर्मि विमला मानन्धरं व लिउ छ्याञ्जे प्रेरणा शाक्यं नं थःथःगु नुगःखँ तयादीगु खः ।