
येँ (नेपालभाषा टाइम्स)-पुलांम्ह प्रधानमन्त्री माधव नेपाल नेतृत्वया नेकपा (एस) विभाजनपाखे वनाच्वंगु संकेत खने दया वःगु दु । थ्वहे संकेत खंकाः प्रधानमन्त्री केपी ओलीं दल विभाजन सम्बन्धी अध्यादेश हयेगु तयारी याःगु दु ।
प्रम ओलीं माधव नेपालया पार्टीयात हे लक्षित यासें हयेत्यंगु थ्व आः छुं ईया लागिं धाःसा स्थगित जूगु दु । नेपाली कांग्रेसया सभापति शेरबहादुर देउवां पना बिउगु कारणं अध्यादेश रोके जूगु खँ धाःगु दु ।
माधव नेपालया पार्टीयाके झिम्ह सांसद दु । उकी मध्ये न्याम्ह पार्टी त्वःताः एमालेय् वनेत तयार जुयाच्वंगु खँ धाःगु दु । उकिं सरकारं संसदीय दलया ५० प्रतिशत सांसदं दल त्वःतल धाःसा न्हूगु पार्टी गठन याये दइ धइगु प्रावधान तयाः अध्यादेश तयार याःगु खः । अध्यादेश कथं नेकपा (एस) विभाजन जुल धाःसा एमाले शक्तिशाली जुइ ।
एमाले शक्तिशाली जुल धाःसा कांग्रेसयात फाइदा जुइ लाकि घाटा ? थौंकन्हय् कांग्रेस दुने थ्व न्ह्यसःयात कयाः सहलह जुयाच्वंगु खँ धाःगु दु । थ्व विषयय् सभापति देउवां इतर पक्षया नेता शशांक कोइरालालिसे आः तक सहलह तकं मयाःनिगु जुयाः आःयात थ्व अध्यादेश स्थगित जूगु सूत्रया दावी दु । एमाले शक्तिशाली जुल धाःसा कांग्रेसयात सरकारं पितिना हयेफु धइगु ग्याःचिकु कांग्रेस नेतातय्के ब्वलंगु खँ नं सूत्रं धाःगु दु ।
माओवादी प्रदर्शन
नेकपा माओवादीं वइगु कार्तिक १० गते येँय् जनप्रदर्शन व खबरदारी सभा याइगु जूगु दु । सरकारया गलत पलाःया विरोधय् माओवादीं थ्व खबरदारी सभा यायेत्यंगु खँ धाःगु दु ।
माओवादी अध्यक्ष पुष्पकमल दाहालं म्हिगः पार्टीया थीथी संगठन इन्चार्ज व अध्यक्षतय्त सःताः थुकिया जानकारी बिसें तयारी यायेत निर्देशन बियादीगु खः ।
विपत् व्यवस्थापनय् खनेदुगु कमजोरी, बेपत्ता जूपिं मालेगु, राहत इनेगु, वासः यायेगु, अस्थायी आवास दयेकेगु व पुनस्र्थापनाया क्षेत्रय् खनेदुगु गल्तीप्रति सरकारयात सचेत याकेत थ्व सभा यायेत्यनागु खँ धाःगु दु ।
LEAVE YOUR COMMENTS