पःखाः छिमेकीलिसेया मिलनविन्दु खः

अमेरिकाया छम्ह प्रसिद्ध कवि रबर्ट फ्रस्टया छगू प्रसिद्ध धापू दु । निम्ह छिमेकी दथुइ दइगु बारं छिमेकीया स्वापू क्वातुकी । विभाजित याइमखु । पिनें स्वयेबलय् बार, पःखाः धइगु विभाजनया प्रतिक खः, थ्व मनूतय् एकताया बाधक खः । जुइ । बार मदुगु, पःखाः मदुगु संसार दयेके दुसा, विश्वया दक्व, फुक्क मनूत छगू हे परिवार जुइ । एक । अद्वैतवादी दर्शनं धाःथें ! गन विभाजनया रेखा निर्मूल जुइ । ‘छ’ व ‘जि’ धइगु संकीर्णताया अन्त्य जुइ । खः । भावनात्मक व दार्शनिक दृष्टिं पःखाः, बार मदुगु अद्वैत विश्वया परिकल्पनां झीत परमआनन्दया अनुभूति बी फु ।

तर कवि रबर्ट फ्रस्टं व्यावहारिक जीवनय् पःखाः, बारया गुगु औचित्य क्यनी, उकिया तुलनाय् अद्वैत स्वापूया परिकल्पना फुस्लुगु आदर्श थें जक जुइ । खनेदइ । व्यवहारं न्ह्याये दयेके मफइगु । कवि फ्रस्टं निम्ह छिमेकी दथुया पःखाःयात विभाजनया रेखा खंकीमखु । मिलन विन्दुया गहन लिधंसा खंकी । पःखाः एकताया आधार जुयाः खनेदइ । फ्रस्टया थ्व कथन थौं व्यावहारिक जगतय् स्यल्लाःगु उखान टुक्का जयाः खनेदइ ।

निम्ह छिमेकी । इमि थःथःगु हे छेँ, जग्गा दु । इमिसं विचाः याइ । इमि छेँ, जग्गा दथुइ दुगु पःखाः थुने । निगुलिं कम्पाउण्ड छगू हे याये । वा ! अले व छगू छधी जूगु छेँ, कम्पाउण्ड विशाल खनेदइ । गुलि बांलाइ ! त्वालय् उलि तःधंगु कम्पाउण्ड दुगु छेँ सुयां दइमखु । मदु । अले व एकीकृत कम्पाउण्ड त्वाः हे नामी छेँ जुइ । मेमेगु छेँत वया न्ह्यःने ‘फुच्चे’ खनेदइ । निम्हं छिमेकी थःथःगु पःखाः थुनाः एकताया गौरव अनुभव याइ । निख्खां छखा छेँ । पिनें स्वइपिं, खनीपिंत छाप बीत स्वइ । नुगः मुइकेत स्वइ । एकता धइगु गुलि सुन्दर । पःखाः धइगु एकताया बाधक । घाटक । सन्देश बीत स्वइ ।

छिमेकी निम्हेसिया एकीकृत छेँ, कम्पाउण्ड खनाः लँय् वइपिनि थीथी प्रतिक्रिया जुइ । गुलिसिनं आश्चर्य प्वंकी । ‘थुमिसं ला गजब यात ‘’ निम्हेसियां छेँ, कम्पाउण्ड एकीकृत यानाः छगू हे याःबलय् स्व गुलि बांलात ! गुलि भव्य ! थुलि बांलाःगु भव्य छेँ, त्वालय् हे मदु का ……. ! आः न्यय्दँ, ख्वीदँ तक नं दइ मखुनि ।’ प्रशंसा याइपिं नं पिहां वइ । गुलिं लँजुवाःतय्सं व्यंग्य नका वनी । ग्वःन्हुया रमिता थ्व ? पःखाःत थुनाः, छेँ कम्पाउण्ड एकीकृत यानाः ‘जिमि मित्रता, प्रेम गुलि क्वातु स्व ! सुनानं थुकियात उखेथुखे याये फइमखु धकाः धाक याःगु जुइ । स्वयेका ! गुलि न्ह्याइ ? इमिगु एकीकृत मित्रता, कम्पाउण्ड ……. थौं ला व लुसि थें मिले जुया क्यनां छु याये ……. ? इमिगु चरित्र छु गज्याःगु धइगु सुनां मसिउगु खःला ? दछि निदँ न्ह्यःतक इपिं खिचा ल्वाःथें ल्वाइपिं जःलाखःलाःत ! आः छु कारणं जुइ इपिं राम लक्ष्मण थें खनेदइ ! तर ग्वःन्हुया निंतिं ? इपिं निम्हं छिमेकी गज्याःपिं धइगु मनूतय्सं बांलाक सिउ’

थौं निख्खां छें, कम्पाउण्ड छगू हे थें क्यनाः मनूतय्त एकताया भ्रम याना जुल ……. आः गुकुन्हु लाइ ……. फुक्क पिहां वइ ……. फुक्क तज्याःगु खाःया गिलास थें कुचा कुचा जुइतिनि …….अझ चकनाचूर ……. पःखाः मदुगु निम्ह छिमेकीया विशाल छेँ, कम्पाउण्ड खनाः भविष्यवाणी याना वनीपिं लँजुवाःत नं दयाच्वनी ।
पःखाःत दक्व तुनाः एकीकृत छेँ, कम्पाउण्डया मंकाः मालिक जुयाच्वंपिं निम्ह छिमेकी पासापिं एकीकृत विशाल, चकंगु कम्पाउण्ड खनाः मख्ख । इमि मचाखाचातय्त नं मिहतेत थाय् चकनी । उखेंथुखें तिंतिं न्हुइत । ब्वाँय् ब्वाँय् वनाः म्हितेत ज्या छिनी । पिने मनूतय्सं इमिगु एकीकृत पवित्र कार्ययात कयाः टिका टिप्पणी याःगु खँत इमिगु न्हाय्पनय् थ्यना च्वनी । निम्हं छिमेकी नापं च्वनाः छ्यं क्वाक्वां खँ ल्हाइ । थ्व फुक्क झीगु एकता, मित्रता खनाः नुगः मूपिनिु खँ खः । झीसं थज्याःगु खँयात चिउताः तये मजिउ । झीसं झीगु महान् एकीकृत भावनायात निरन्तरता बीमाः । झीत सुनानं हेपे याये फइमखु । निम्हेसियां एकमत क्यनी । झीत तछ्यायेत स्वइपिंत झीसं थःगु स्कतां परास्त यायेमाः। इमिसं प्रण याइ ।

निदँ लिपा । निम्हं छिमेकी तनावय् । इमिसं थःथःगु पःखाः थनेत तीव्र बहस याना च्वनी । ‘जिगु चिं थन’ छम्हेसिनं धाइ । ‘जिगु सीमा थन’ मेम्हसिनं दावा याइ । चिं, सीमाया बारे मतभेद खनेदइ । ल्वापु जुइ । निखलःािइ । सया परिवार नं वइ । ‘छ खुँ, छ ज्यानमारा’ छम्हेसिनं म्हुतुवाइ । ‘सुयात ज्यानमारा धया ! छ बेश्यामां !’ मेगु पक्षं हाकनं धाइ । ‘छंत धइगु का ज्यानमारा ! छ ल्यवःसिंया काय !’ मेम्ह छिमेकीप्रति आक्रमण याइ । ‘खः ला छंत थन हे स्यानाबी, जिमि मांयात ल्यवःसिं धया ला ?’ ‘छ ज्यानमारां जितः बेश्याया काय छाय् धयागु ले ?’ मेम्हेसियां सः तसः याइ ।

मूल खँ सीमारेखा हे जुइ । तर ल्वापुं मेगु हे रुप काइ । वं वयात वं वयात मांदिक्व म्हुतु ल्हाइ । हाताहात जुइ । निखेरंया परिवार नं विपक्षीपाखें अप्पां कयेकी । म्हुतु वाइ । लँय् वनःपिंसं निम्ह छिमेकी दथुइ जुयाच्वंगु ल्वापु, भनाभन, हानाहान खनी । गुलिसिनं धाइ गुलिं बांलाःगु एकता भंग जुल । नुगः मछिंकी । गुलिसिनं हास्यास्पद भासं धाइ ‘निम्ह अहंकारीतसें दुनियाया मिखाय् धुलं छ्वाके थें एकताया नाटक क्यन ! खन मखुला एकता ?’

निम्हं छिमेकी सर्वोच्चय् वनी । मुद्दा दर्ता याइ । ‘जितः बेश्याकाय् धाल, प्रमाणित यायेमाल ।’ छम्हेसिनं मुद्दा तइ । मेम्हेसिनं ‘जितः ल्यवःसिंया काय धाल’ मुद्दा दर्ता याइ । न्याये माल न्ह्यथनी । मुद्दा अदाल तय् । निम्हं अदालतया फैसला पियाच्वंगु दु । थ्व घटना बारे न्यने । जितः कवि रबर्ट फ्रस्टया कविता लुमनी । पःखाः, बार छिमेकीलिसेया मिलनया प्रतीक खः । जुइ । थुकियात थुनेमते । भीषण ल्वापु जुइ ।