ने. सं. ११४३ ञलाथ्व चतुर्दशी -

न्ह्यसः तये जी ला ?

छुं न्हि न्ह्यः । डा. बाबुराम भट्टराई भारतय् वासः याकेत वनी । वने न्ह्यः । डा. बाबुरामं छगू वक्तव्य पित बी । विदेशय् वनाः वासः याकः वने माल, थःत लज्जाबोध जूगु दु। व्यक्त याइ । अपराधबोध जूगु खँ न्ह्यथनी । मखु, थुलिमछिं नेतात भारतय् वनाः उपचार याकः वनाच्वंगु दु। वय्कःयात जक छाय् लज्जाबोध जुल ? जुइमाःगु? न्ह्यसः लुइ । वय्कःया थ्व लज्जाबोधया अभिव्यक्ति मनूतय्सं राजनीतिक र· नं खंका हइ । खतुं स्वास्थ्य परीक्षण याकाः डा भट्टराई देशय् लिहां वयेधुंकूगु दु। तच्वःगु ल्वय् जुइकाः भारतय् च्वनाः उपचार नं यायेमाःगु जूसा वय्कः अझ गुलि लज्जित जुइगु जुइ? वय्कःया लज्जाया पारु गन थ्यनीगु जुइ? वय्कःया लज्जा नियन्त्रण यायेत हे विशेष उपचार मालीगु जुइ ! तर सौभाग्यवस ! स्वास्थ्य परीक्षण याकाः वय्कः लिहां वसां जिल । बां हे लात। डा. भठ्ठराई नं अतिरिक्त लज्जाबोध यानाच्वने म्वाःल । भारतय् च्वनाः ताःकाल तक वासः याके माःगु खःसा ! डा. साहेबयात नेपाली जनताया न्ह्यःने जरुर नं ख्वाः गथे यानाः क्यने धइथें जुइगु जुइ? व संकट फये म्वाःल । डा. भट्टराईया लज्जाबोध शायद वय्कःया राष्ट्रवादी चेतनाया कारणं जूगु जुइमाः । देशय् चिकित्साशास्त्रया गाक्कं उन्नति जूगु खःसा देशय् हे माःगु स्वास्थ्य परीक्षण, उपचार याये दइगु खः । विदेशया शरणय् वने माली मखुगु जुइ । देय्या कमजोर विकासया कारणं थौं देय्या राष्ट्रवादी नेतात मयः मयः बाध्य जुयाः परदेशय् उपचारया निंतिं वने माली । डा. भट्टराईया लज्जाबोध थ्व अर्थय् अर्थपूर्ण खनेदइ । देय्या चिकित्सा ख्यलय् यथेष्ट विकास जुइ मफुनि। थ्व कटुसत्य, हीनताबोधपाखे डा. भट्टराईया लज्जाबोधं कटुसंकेत याःगु खनेदु। जनतां अनुमान याइ ।

खतुं देशय् थौं चिकित्सा विज्ञानया ख्यलय् विकास मजूगु मखु। भव्य अस्पतालत दयेधुंकल । क्षमतावान, योग्य चिकित्सकत वयेधुंकल । देय् दुनेया मेडिकल कलेजं दँय्दसं द्वलंद्वः चिकित्सकत उत्पादन यानाच्वंगु दु। प्रधानमन्त्रीया जँलास्येँया प्रत्यारोपण देशय् हे जुल । देशय् स्वास्थ्य परीक्षण व उपचारया अवसरत सृजना जुइधुंकल । तर दुःखया खँ । नेपालय् जूगु गुगुं नं विकास आम जनताया निंतिं लक्षित धाःसा मखु। धनीवर्ग व शक्तिशाली नेतातय् निंतिं जक जुया बी । आम जनतां विकासया फल फ्ययेतक नं दइमखु। आम जनताया निंतिं ततःधंगु अस्पतालत, उपचार केन्द्रत न्हाय् कं दुनेया किचः जक खः । देशय् दुगु विकासय् जनताया पहुँच सम्भव मजू । जुइ मखु। पहुँच पिनेया खँ जुइ ।

हालय् चिकित्सकतय् फी वृद्धि जुइ । निर्ममकथं । चिकित्सकयात स्वास्थ्य परीक्षण याकेत आः छक्वःयात गुसः पुले माल । काइगु जुल । आम जनताया आर्थिक अवस्थां न्ह्याये मदइकथं चिकित्सकतय् फी वृद्धि जुइ । जनताया आर्थिक क्षमताया भ्याःभचा हे चिउताः मतसे चिकित्सकतय् फी अन्धाधुन्ध थकया बी । ध्यबा फुके फुसा वा, मखुसा वयेमते । थज्याःगु क्रुर चुनौति थ्व फी वृद्धिं आम जनतायात वियाच्वंगु दु। जनताया स्वास्थ्य उपचारया मौलिक अधिकारयात स्वयम सरकारं क्वत्यला बिउगु दु। अराजकता ब्वलंका च्वंगु दु ।

जनताया आर्थिक क्षमताया भ्याःभचा हे चिउताः मतसे चिकित्सकतय् फी अन्धाधुन्ध थकया बी । ध्यबा फुके फुसा वा, मखुसा वयेमते। थज्याःगु क्रुर चुनौति थ्व फी वृद्धिं आम जनतायात वियाच्वंगु दु ।

चिकित्सकतय् फी वृद्धियात कयाः चिकित्सक संघया नायःयात न्ह्यसः तइ । तर नायलं फी वृद्धियात पूर्ण समर्थन यासें धाइ । ‘खसिया लाया भाः गनया गन थ्यनेधुंकल । जग्गाया भाः गनया गन जुइधुंकल । चिकित्सकतय् फी जक छाय् थमकायेगु? लखौं ध्यबा डाक्टर ब्वनेत माः । इमिगु लगानी पुलांगु फी नं सायेके फइला ? फी वृद्धि न्यायोचित, जायज ।’ चिकित्सक संघया अध्यक्षं चुनौति बी । थौं स्वास्थ्य उपचारयात खसिया ला विक्रेता, जग्गा दलालीलिसे तुलना यानाः आम जनताया स्वास्थ्य उपचारप्रति अनुत्तरदायीपूर्ण तर्क पिहां वयाच्वंगु दु। देय्या सम्पूर्ण नेतातय्सं थौं समाजवादया खँ ल्हाइ । जनताया समृद्धिया भजन हाली । स्वास्थ्य, शिक्षा जनताया अत्यावश्यक वस्तु खः, थ्व जनताया मौलिक अधिकार दुने लाः ! शक्ति प्राप्त यायेत नेतातय्सं जनताया अत्यावश्कता पूर्ति जुइ । याये । भाषण बियाच्वनी । आधारभूत आवश्यकता निःशुल्क याये माःथाय् थौं अन्धाधुन्ध स्वास्थ्य उपचारया शुल्क वृद्धि यानाः सरकारं जनविरोधी ज्या न्ह्याकाच्वंगु दु। चिकित्सकतय् फी लुँया भाः थें थकायाच्वंगु दु ।

थौं देशय् मेडिकल कलेज दक्वफुक्क माफियातय् ल्हाती । चिकित्सक विद्यार्थीपाखें लखौंलख अध्ययन शुल्क कयाः लुट यानाच्वंगु दु। मेडिकल माफियातसें विद्यार्थीतपाखें लुटे याःगु ध्यबा ब्वने सिधयेकाः चिकित्सकतय्सं जनतापाखें सयेकेत स्वइ । थ्व सामान्य जनताप्रति शोषण मखुला ? अथे हे विकसित देय्या उपचारया सुविधा दुगु अस्पताल नं व्यापारी माफियातय् ल्हाती । अन्धाधुन्ध दां कमे यायेगु लक्ष्यं ग्रस्त चिकित्सा उपचारया संस्थात । चिकित्सक संघया नायलं फी वृद्धिया समर्थन यासें धाइ, ‘निःशुल्क सेवा काये माःपिं सरकारी अस्पतालय् वनेगु। अन सितिकं सेवा कायेगु सुविधा दइ । थौं सरकारी दक्व अस्पतालत बेहालय् । अन जनतां सन्तोषजनक उपचार काये फइगु स्थिति मदु। थिकेगु सःशुल्क पुलाः उपचार कायेत थौं जनता बाध्य । स्वास्थ्य उपचारया नामय् जनतायात कंगाल याइगु माफिया, शोषकतसें संचालित स्वास्थ्योपचारया अवसर स्वयम आम जनतायात आर्थिक दृष्टिं घाटक ल्वय् जुयाबी । उपचारया निंतिं गुलि मनूत छेँ-बुँ विहीन जुइ माली । आर्थिक कमजोरीया कारणं गुलिखे मनू विना उपचार मृत्युया शिकार जुइ माली । जनहित, जनकल्याणया खँ ल्हानाः गबलें थाके मजुइपिं नेतात जनताया स्वास्थ्योपचारया ख्यलय् जुयाच्वंगु लुटप्रति छाय् मौन ? नागरिक समाज छाय् मूक ? जनताया कल्याण, समृद्धिया नारा नेतातय् थःगु राजनीतिक अभिष्ट पूरा यायेत जनतायात ध्वं लायेगु अस्त्र जक खःला ? डा. बाबुराम भट्टराई ! भारतय् वनाः वासः याकः वनेमाःबलय् छितः लज्जाबोध जुल ! थौं देशय्चि कित्सा ख्यलय् जुयाच्वंगु लुटं जनता सी नं मफु, म्वाये नं मफुगु अवस्था लानाच्वन । छिगु लज्जाबोधं थन थाय् छाय् ज्या मबियाच्वन ? न्ह्यसः तये जी ला ?