नेपाः व युनेस्कोया सहकार्य निगू दशक

नेपाः व संयुक्त राष्ट्र संघीय निकाय युनेस्को दथुइ सहकार्य जूगु निगू दशक पूवंगु दु । नेपाः व संयुक्त राष्ट्र संघीय शैक्षिक, वैज्ञानिक व सांस्कृतिक संगठन (युनेस्को) दथुइ सहकार्य जूगु २० दँय् क्यंगु खः । थौं स्वयां निगू दशक न्ह्यव राजधानीया हे छगू होटलय् छम्ह व्यक्तिपाखें शुरु जूगु युनेस्कोया ज्याकू थौंया इलय् तक थ्यंबलय् स्वीम्ह स्वयां अप्वः कर्मचारीया कार्यस्थलय व कर्मक्षेत्रया रुपय् रुपान्तरण जूगु दु । युनेस्कों नेपाः सरकारलिसेया सहकार्यय् शिक्षा, विज्ञान, संस्कृति, सूचना व संचारलिसे सम्बन्धित सरकारी नीति व कार्यक्रमया सुदृढीकरणयालिसें शान्ति निर्माण, गरिबी म्हो यायेगु व दिगो विकासनापं अन्तरसांस्कृतिक संवादया क्षेत्रय् योगदान बिया वयाच्वंगु दु ।लैंगिक समानताया नापं प्रौढ शिक्षाय् विशेष ध्यान बियाः सकसिगुं निंतिं गुणस्तरीय शिक्षा सुनिश्चित यायेगु मुख्य उद्देश्य कयातःगु युनेस्कों याःगु पैरवीया परिणामस्वरुप राष्ट्रिय योजना आयोगं झिक्वःगु पञ्चवर्षीय योजनाय् सकसिगुं निंतिं शिक्षा सम्बन्धी लक्ष्य प्राप्तिप्रति नेपाःया प्रतिवद्धतायात हाकनं बः बीगुया नापनापं सम्बन्धित लक्ष्य क्वःछिउगु खः ।

औपचारिक व अनौपचारिक शिक्षालिसें सम्बन्धित विषयय् तथ्यपरक निर्णय यायेत, योजना निर्माण नापं सेवा प्रवाहय् ग्वाहालि यायेगु ल्याखं युनेस्कों शिक्षा विभाग व अनौपचारिक शिक्षा केन्द्रय् शैक्षिक व्यवस्थापन सूचना प्रणाली स्थापनाया निंतिं नं ग्वाहालि याःगु खः । दिगो विकास लक्ष्य नं. ४ नापं शिक्षा २०३० ज्याझ्वः हासिल यायेगु नेपाःया प्रतिवद्धतायात दृष्टिगत यानाः युनेस्कों सकसिगुं निंतिं साक्षरता व जीवनपर्यन्त सयेके सीके यायेगु अवर बीगु निंतिं सरोकार दुपिनिगु क्षमता विकासय् सक्रिय रुपं ग्वाहालि याना वयाच्वनागु नेपाःया निंतिं युनेस्कोया प्रतिनिधि क्रिष्टियन म्यानहार्टं कनादी । सांस्कृतिक क्षेत्रय् युनेस्कोया ज्याकुथिं थीथी समुदायया दथुइ सांस्कृतिक विविधता व संवादया प्रवद्र्धनया माध्यमं नेपाःया मूर्त व अमूर्त समृद्ध सांस्कृतिक सम्पदाया संरक्षण, जगेर्ना व सुरक्षाय् ग्वाहालि बिया वयाच्वंगु दु । अथे हे युनेस्कोया ज्याकुथिं नेपाःया प्यंगू विश्व सम्पदास्थलया संरक्षण यायेगु ज्याय् नेतृत्वदायी भूमिका नं म्हिता वयाच्वंगु दु ।

२०७२ साल बैशाख १२ गतेया तःभुखाचं क्षति जूगु स्वनिगःया स्मारक क्षेत्रया पुनरुद्वार, शाक्यमुनि गौतम बुद्धया जन्मस्थल लुम्बिनीलिसें उकिया जःखः च्वंगु बौद्धस्थल व बौद्ध सम्पदाया संरक्षण, चितवन व सगरमाथा राष्ट्रिय निकुञ्ज थेंज्याःगु निगू प्राकृतिक विश्व सांस्कृतिक सम्पदास्थलं सामना यायेमालाच्वंगु चुनौति समाधान यायेत सक्षम निकाययात बिया नं युनेस्कों बिया वयाच्वंगु ग्वाहालि दुने लाः । अथे हे युनेस्को भगवान बुद्धया जन्म संकेत शिला (ल्वहं), मायादेवीया मूर्ति व अशोक स्तम्भ थेंज्याःगु ऐतिहासिक व पुरातात्विक महत्वया कलाकृतिया संरक्षण व संवद्र्धन नापं उकिया निरीक्षण यायेगु नापं लुम्बिनी क्षेत्रया पवित्र उद्यान उकिसनं विशेष यानाः मायादेवी देगः जःखः याःगु उत्खनन्पाखें इशापूर्व खुगूगु शताब्दीया गौतम बुद्धया जीवनकालीन संरचनाया प्रमाण नं लुइकूगु दु । संचार व सूचनाया क्षेत्रय् उगु ज्याकुथिं पत्रकार, सामुदायिक संचारमाध्यमलिसे सम्वद्ध संचारकःमि व मानवअधिकार अभियानकःमिया क्षमत विकास यानाः अभिव्यक्ति स्वतन्त्रता व जनताया सूचनाय्तकया पहुँच प्रवद्र्धन यायेगु ज्या नं याना वयाच्वंगु दु । पत्रकार व प्रेस स्वतन्त्रताप्रतिया युनेस्काया प्रतिवद्धतां संचार विकासया क्षेत्रय् थुकियात अग्रणीकर्ताया रुपय् तकं स्थापित याःगु दु ।

सम्बन्धित बुखँ

LEAVE YOUR COMMENTS