ने. सं. ११४४ कौलाथ्व चौथी -

‘भाषा विधेयक कार्यान्वयनय् यंकेत संचारमाध्यमया सक्रिय भूमिका माली’

यल (नेपालभाषा टाइम्स)÷ बागमति प्रदेश सांसद शैलेन्द्र बज्राचार्यं आः याकनं हे बागमति प्रदेशय् नेपालभाषा व तामाङ भाय् कामकाजि भाय्या रुपय् छ्यलीगु धयादीगु दु । कन्फराक्टीभ मिडिया सोलुसनया ग्वसालय् जूगु छगू ज्याझ्वलय् वय्कलं थथे धयादीगु खः । ज्याझ्वलय् सांसद बज्राचार्यं कन्फराक्टीभ हलया उलेज्या लिसें www.ebukhan.com या शुभारम्भ नं यानादीगु खः ।

कन्फराक्टीभ हल व www.ebukhan.com या उलेज्या यायेधुंकाः न्ववासें सांसद बज्राचार्यं प्रदेशय् भाय् सम्बन्धि विधेयक पारित जुइधुंकूगु व आः याकनं कार्यान्वयन जुइ धयादिल । ‘गणतन्त्र, लोकतन्त्रय् थ्व विधेयक अःपुक पारित जूगु थें च्वनेफु तर थुकी यक्वसिगु ताःहाकःगु संघर्ष व योगदान दु । आः थुकियात कार्यान्वयनय् यंकेत स्थानीय समाज लिसें स्थानिय संचार माध्यमया सक्रिय भूमिका आवश्यक जुइ’ बज्राचार्यं धयादिल । आः स्थानीय नेपालभाषा प्रदेशया कामकाजि भाय् जुइगु अवस्थाय् नेपालभाषाया संचारमाध्यमतय्सं नं व्यवसायिक रुपय् न्ह्याःवनेत स्पष्ट योजना दयेकेत इनाप यासें थुकी थम्हं फक्व ग्वहालि यायेगु प्रतिवद्धता नं प्वंकादिल ।

कन्फराक्टिभ मिडिया सोलुसनया नायः बिराजकाजी राजोपाध्यायं स्थानीय बिषयबस्तुयात ल्ह्वनेत व न्हूगु खोजीया नितिं कन्फराक्टिभ हलयात संवाद व अन्तरक्रियाया दबूया रुपय् विकास यायेगु धयादिल । मूलधारया धयावःगु संचारमाध्यमया मिखाय् मलाःगु स्थानीय सः, स्थानीय मुद्दा व विषयवस्तु हे समाचारडेस्क व ईबुखँया मेन न्यूज जुइगु राजोपाध्यायया धापू खः । ‘खुदँ न्ह्यःनिसें न्ह्याकाच्वनागु खय् भाषाया न्यूज पोर्टल www.ebukhan.com य् नं स्थानीय विषयवस्तु व मुद्दायात प्राथमिकता बिया वयागुलिइ आः ईबुखँय् स्थानीय विषयवस्तु स्थानीय मांभासं हे सम्प्रेषण यायेगु जुइ । थ्व निगू डिजिटल दबूया नापं कन्फराक्टिभ हलयात भौतिक रुपं मुनाः स्थानीय विषयवस्तुइ संवाद, अन्तरक्रियाया नितिं छ्यलेगु जुइ’ राजोपाध्यायं धयादिल ।

ईबुखँया सम्पादक विशाल राजभण्डारीं स्थानीय मुद्दा, विषयवस्तुयात सशक्त ढंगं सम्प्रेषण यायेत स्थानीय समाजया सक्रिय ग्वहालिया नितिं इनाप यानादिल । ‘थौं ईबुखँ न्ह्यात तिनि, थुकियात जिं धायेगु छुं हे मदुनि । झी सकलें जानाः थ्वयात न्ह्यःने यंके । झीगु सः, झीगु खँ झी हे जानाः सशक्त ढंगं ल्ह्वनेनु’ सम्पादक राजभण्डारीं धयादिल ।
कन्फराक्टिभ मिडिया सोलुसनं खुदँ न्ह्यःनिसें खय् भाषाया न्यूज पोर्टल समाचारडेस्क डट कम न्ह्याकावःगु दु, गुकी बिराजकाजी राजोपाध्याय सम्पादक खः । आः थुगु हे कम्पनीं नेपालभाषाया न्यूज पोर्टल भदगपजबल।अयm नं न्ह्याकूगु दु ।