अन्ततः जसपा तज्याइगु निश्चित

येँ – जनता समाजवादी पार्टी (जसपा) या नेता महन्थ ठाकुर व मेम्ह नेता उपेन्द्र यादव पक्षया दथुइ सहमति जुइगु सम्भावना समाप्त जूगु दु । म्हिगः निर्वाचन आयोगं निगुलिं पक्षयात सःता सहलह याकूगु खःसां अन छुं कथंया सहमति मजूगु खः । थुकिं यानाः आः आयोगं छगू पक्षयात आधिकारिकता बीमाःगु अवस्था ब्वलंगु खँ धाःगु दु ।

उपेन्द्र यादव पक्षं राजनीतिक दल सम्बन्धी ऐनया दफा ४४ कथं पार्टीया आधिकारिकता सम्बन्धी विवाद ज्यंकेगु निंतिं निवेदन बीधुंकाः आयोगं निगुलिं पक्षयात सःतूगु खः ।
म्हिगः आयोगय् निवेदक पक्षपाखें उपेन्द्र यादव, महेन्द्र राय, राजेन्द्र श्रेष्ठ, प्रकाश अधिकारी व मृगेन्द्र सिंह उपस्थित जूगु खःसा ठाकुर पक्षपाखें महन्थ ठाकुर, राजेन्द्र महतो, शरद सिंह भण्डारी, अनिल झा, लक्ष्मणलाल कर्ण, केशव झा व सुरेन्द्र झा उपस्थित जूगु खः ।

आयोगं निगुलिं पक्षयात सहमति याकेगु कुतः कथं सहलह याकूगु खः । तर सहमति जुइ मफुत । अध्यक्ष उपेन्द्र यादवं पार्टीइ बिस्कं बिस्कं गतिविधि जुयाच्वंगु व नापं च्वनेगु अवस्था मदुगु खँ कनादीगु खः । अथे हे मेम्ह अध्यक्ष ठाकुरं धाःसा उपेन्द्र यादवया पार्टी तज्यायेत्यंगु अवस्थाय् थ्यंगु इलय् थःपिसं एकता यानाः पार्टी बचे यानाबियागु खःसां नं आः थःपिंसं यानागु गुण ल्वःमंकूगु द्वपं बियादीगु खः । वय्कलं माग व मुद्दा त्वःता वंगु व अग्रगमन धाधां प्रतिगमनपाखे वंगुलिं यादव पक्षं थःगु पलाः भिंकाः वःसा जक नापं वने फइगु खँ नं धयादिल ।

लिसलय् यादव पक्षं नापं च्वनेगु अवस्था मदुगुलिं आधिकारिकता बारे निर्णय याना बीत निवेदन बियागु खँ धयादिल । आः आयोगं पार्टीया निवेदन कथं आधिकारिकता बारे निर्णय याइगु खँ धाःगु दु । निगुलिं पुचलं पार्टीया ध्वाँय् व चिं दावी यानाच्वंगु दु । ठाकुर पुचः थःपिनिगु पुलांगु हे नां ‘राष्ट्रिय जनता पार्टी (राजपा)’ य् वनेत स्वयाच्वंगु खँ धाःगु दु ।

थ्व स्वयां न्ह्यः ठाकुर पक्षं प्रधानमन्त्री केपी शर्मा लिसे सम्झौता यानाः सरकारय् वनेधुंकूगु खःसा सर्वोच्च अदालतया आदेश लिपा सरकारं लिहां वयेमाःगु खः । उकथं हे यादव पक्ष ओली संसद विघटन यानाः प्रतिगमनपाखे न्ह्याः वंगु धासें कांग्रेसया सभापति शेरबहादुर देउवाया नेतृत्वय् सरकार गठन यायेगु लागिं ग्वाहालि यानाच्वंगु दु ।