मंकाः खलः विधिवत् दर्ता

येँ – नेपालभाषा मंकाः खलः म्हिगः विधिवत रुपं येँ जिल्ला प्रशासन कार्यालयय् दर्ता जूगु दु । नेपालभाषा आन्दोलनया न्ह्यलुवा लिसें जनकवि दुर्गालाल श्रेष्ठया अध्यक्षताय् संस्था विधिवत रुपं दर्ता यायेगु ज्या जूगु खः । अथे हे मंकाः खलः स्थानीय निकायय् नं दर्ता यायेमाःगु प्रावधान कथं वडाया लिसें येँ महानगरपालिकाय् नं दर्ता यायेगु ज्या म्हिगः क्वचाःगु दु ।

संस्था दर्ता लिपा न्हापांगु चरणया ज्या क्वचाःगु व आः न्हूगु ज्याझ्वः कथं लिगंजः व याकःछि जः मुनाः याकनं हे अधिवेशन यानाः मंकाः खलः न्हूगु पुस्तायात हस्तान्तरण यायेगु प्रतिवद्धता नं न्हू नीस्वंगु कार्यसमितिं प्वंकूगु दु । उकिया निंतिं आः न्हियान्हिथं ज्या यायेगु कथं तयारी तकं जुइधुंकूगु खँ सीदुगु दु ।

संस्थापन पक्षया सहलह लिपा बिउगु म्याण्डेड कथं मंकाः खलः दर्ता यायेगु ज्या जूगु व संस्था दर्ता यायेधुंकाः मंकाः खलःया मू एजेन्डा अधिवेशन जूगुलिं याकनं हे अधिवेशन यायेत न्हूगु ज्यासना पुचलं प्रतिवद्धता प्वंकूगु दु ।
लिसें नेवाः ख्यलय् खने दयाच्वंगु थीथी समस्यायात नं सहजीकरण यायेगु व नेवाःतय् मुद्दायात नं ऐक्यवद्धता क्यनेगु कथं न्हिथंया ज्या नं जुइगु खँ धाःगु दु ।

नेपाल संवत १०९९ स थापना जूगु नेपालभाषा मंकाः खलः वंगु निगू दशक निसें अधिवेशन मजुयाच्वंगु खःसा संस्थायात वैधानिक रुपं दर्ता यायेगु ज्या नं मजुयाच्वंगु खः । ताः ईया सहलह लिपा संस्था दर्ता यायेगु ज्या जूगु खःसा थुकिं नेवाः आन्दोलनयात थप तिबः जुइगु विश्वास कयातःगु दु ।

नेवाः आन्दोलनयात न्हापांखुसी सांगठनिक रुपं न्ह्याकेगु ज्या याःगु नेपालभाषा मंकाः खलकं सकल नेवाःतय् इच्छा कथं मंकाः दबूछेँ निर्माण यायेगु ताः तयातःगु दु गुगु आः तक पूवंके मफुनि । आः थुपिं ज्याखँत याना वनेत नं सहज जुइगु खँ धाःगु दु ।

मंकाः खलःया पदाधिकारीपिं
म्हिगः दर्ता याःगु नेपालभाषा मंकाः खलःया पदाधिकारीपिं थुकथं दु –
नायः-  दुर्गालाल श्रेष्ठ,
न्वकु-  मल्ल के. सुन्दर
छ्याञ्जे-  पुष्पानन्द शाक्य (राजा शाक्य),
दांभरी- गणेश साय्मि,
दुजःपिं – किरण श्रेष्ठ, डा. चुन्दा वज्राचार्य व मंगला कारंजित ।

थ्व पदाधिकारीपिं सकलें नेपालभाषा मंकाः खलःया न्हापा न्हापाया कार्यसमितिइ च्वनाः ज्या यानादीधुंकूपिं खः । थ्व बाहेक खलःयात न्हियान्हिथंया ज्या यायेगु लागिं थ्व थुगु कार्यसमितियात ग्वाहालि यायेगु लागिं भाषाह्यमिपिनिगु मेगु छगू ग्वाहालि पुचः गठन याइगु खँ धाःगु दु । थ्व ग्वाहालि पुचलय् मंकाः खलःया पुलांपिं दुजःपिं लिसें थौंकन्हय् आन्दोलनय् सहभागी जुयाच्वंपिं ल्याय्म्हपिं नं दुथ्याका यंकीगु खँ धाःगु दु ।

सम्बन्धित बुखँ

LEAVE YOUR COMMENTS