ने. सं. ११४४ कौलाथ्व चौथी -

ग्रिन पिस को–एडया रजत जयन्ती व अभिभावक दिवस

येँ – थनया गणबहालय् च्वंगु ग्रिन पिस को–एड स्कुलया रजत जयन्ती व अभिभावक दिवस वंगु आइतवाः जुल । विद्यालय स्थापना जूगु २५ दँ क्यंगु लसताय् लाकाः जूगु ज्याझ्वलय् ब्वनेकुथिया ब्वँमिपिंसं थीथी सांस्कृतिक ज्याझ्वः न्ह्यब्वःगु खः । मूपाहां शिक्षाविद् प्रा. डा. रामकृष्ण महर्जनं रजत जयन्ती व अभिभावक दिवस ज्याझ्वःया उलेज्या यानादीगु खः ।

ज्याझ्वलय् नवासें वय्कलं शिक्षा ख्यःया विकासपाखें हे जक देय्या विकासय् नं ग्वाहालि याये फइ धासें शिक्षाया भविष्य उज्ज्वल दु धयादिल । वय्कलं ब्वनेकुथितय्सं गुणस्तरीय शिक्षाय् बः बिया वनेमाः धासें सकारात्मक चिन्तन कयाः न्ह्याः वने फत धाःसा मानव जीवन नं सार्थक जुइ धयादिल ।

ज्याझ्वलय् पुलांम्ह शिक्षा अधिकारी लिसें नांजाःम्ह म्येँ च्वमि बुद्धवीर लामां ब्वनेकुथि, अभिभावक व ब्वँमिपिनिगु मंकाल कुतलं हे गुणस्तरीय शिक्षाय् ग्वाहालि जू वनीगु विश्वास प्वंकादिल । ब्वनेकुथिया प्रिन्सिपल पेमा योञ्जनं ब्वनेकुथिया थीथी गतिविधिया बारे जानकारी बियादीगु खःसा ज्याझ्वलय् ब्वनेकुथिइ ताःई न्ह्यवंनिसे सेवा याना वयाच्वनादीपिं शिक्षक–शिक्षिकापिंत सम्मान नं याःगु खः ।

ज्याझ्वलय ब्वनेकुथिया ब्वँमि नापं पुलांम्ह कुमारि मतिना शाक्यं हुलाप्याखं न्ह्यब्वयादीगु खःसा जीवित देवी श्री गणेश व स्कुलया क्याप्टेनं नं थःगु नुगः तयादीगु खः ।