ने. सं. ११४४ कौलाथ्व तृतीया -

१०० किलो लुँ सुयागु ?

येँ (नेपालभाषा टाइम्स)- त्रिभुवन अन्तर्राष्ट्रिय विमानस्थल जुयाः पिहां वनेधुंकूगु करिब १०० किलो लुँ ज्वंगु खँयात कयाः आः राजनीतिक विवाद समेत पिहां वःगु दु । माओवादी समर्थित छुं सञ्चार माध्यमतय्सं थ्व काण्डय् ल्हाः दुम्ह धासें व्यवसायी दीपक मलहोत्रायात न्ह्यःने तयाः वय्कःया स्वापू एमालेलिसे क्वातु धइगु आशयया समाचार च्वया हयेवं एमाले समर्थित सञ्चार माध्यमतय्सं नं गृह मन्त्रालयया मिलोमतो मदयेक थुलिमछि लुँ पित यंके फइ मखु धासें थुकी गृहमन्त्री नारायणकाजी श्रेष्ठया समेत ल्हाः दयेमाः धकाः आशंका याना हःगु दु ।

त्रिभुवन विमानस्थलं प्रहरी, सशस्त्र प्रहरी व सेनाया सुरक्षा घेरा पार यानाः पिहां वनेधुंकूगु थ्व लुँ लिपा भन्सारया कर्मचारीतय्सं ज्वंगु खः । थ्व काण्डय् ल्हाः दुपिं धकाः आः तक छम्ह चिनियाँ नागरिक लगायत न्हय्म्हेसित ज्वंगु दु । तर थ्व लुँ सुनां हःगु व गन यंकेत्यंगु धइगु खँ धाःसा आः तक सार्वजनिक मजूनि । थ्व काण्डय् एअरपोर्टया फुक्क हे सुरक्षा निकाय व कर्मचारीयात कारवाही यायेमाःगु माग नं जुयाच्वंगु दु ।

थ्व लुँ हंगकंगं वःगु विमानं स्कुटर व मोटरसाइकलया ब्रेक सु दुने सुचुकाः हःगु खः । ब्रेक सु दुने तया हःगु जूगुलिं वास्तवय् लुँ गुलि दु धकाः तकं धाये मफुनि । लुँ लनेत ब्रेक सु गाले यानाः पिकाये मानिगु जूगुलिं थ्व ज्या छन्हु निन्हु् लिपा जक सिधइ धाःगु दु ।

आः थ्व लुँ राष्ट्र बैंकया धुकुतिइ तयातःगु दनि । लुँ काण्डबारे छानबिन यायेत भन्सार विभागया अनुसन्धान शाखाया निर्देशक मानबहादुर पौडेलया नेतृत्वय् छगू समिति नं गठन याःगु दु ।