ज्ञानमाला बौद्ध जागरण अभियान

यल- नेपाल राष्ट्रिय ज्ञानमाला समिति यल क्षेत्रीय उपसमितिया ग्वसालय् खुक्वःगु ज्ञानमाला बौद्ध जागरण अभियान ज्याझ्वः जुल । श्रीबच्छ महाविहार ज्ञानमाला भजन खलः श्रीबहाःया व्यवस्थापनय् उगु ज्याझ्वः जूगु खः ।

श्रीबच्छ महाविहार भजन खलःया नायः रत्नबहादुर शाक्यया सभापतित्वय् जूगु ज्याझ्वलय् बौद्ध विद्वान प्रा. डा. वज्रराज शाक्य मूपाहां जुयादीगु खः । पंचशील प्रार्थना यासें न्ह्याःगु ज्याझ्वलय् श्रीबच्छ ज्ञानमाला भजन खलःया न्कवू मुनाभूषण शाक्यं लसकुस यानादीगु खः ।
मूपाहांया थासं बौद्ध विद्वान शाक्यं राणाकालीन इलय् नेपालं थेरवादी बौद्ध भिक्षुपिंत देशं पितिनाः छ्वःगु चर्चा यानादिसें व हे इलंनिसें देशय् बौद्ध जागरण वःगु व ज्ञानमाला भजन हालेगु नं अप्वया वंगु खः धयादिल । लिसें वय्कलं थौंया न्हू पुस्तायात नं थ्व ख्यलय् न्ह्याः वनेत इनाप यानादिल ।

श्रीबच्छ ज्ञानमाला भजन खलःपाखें लसकुस म्येँ नापं ज्ञानमाला भजन नं न्ह्यब्वःगु ज्याझ्वलय् उप–प्रा. वज्रमुनी वज्राचार्यं ‘जगत जन्मया सार’ नांया ज्ञानमाला म्येँयात कयाः ब्याख्या यानादीगु खः । पाहांकथं झायादीम्ह यल ज्ञानमाला समितिया नायः दबलबहादुर शाक्यं नं नुगःखँ तयादीगु ज्याझ्वलय् राष्ट्रिय ज्ञानमाला समितिया मूछ्यांजे इन्द्रमुनी शाक्यं ज्याझ्वःया उद्देश्य नापं ज्ञानमाला जागरण अभियान बारे जानकारी बियादीगु खः ।

समितिया केन्द्रीय दुजः, यलया स्वीन्यागू ज्ञानमाला भजन खलःया प्रतिनिधिपिनिगु उपस्थिति दुगु ज्याझ्वलय् धापाख्यः ज्ञानमाला भजन खलःया ८५ दँ दुम्ह सक्रिय दुजः राम महर्जनयात दोसल्लां न्ययेकाः हंगु खः ।ज्याझ्वलय् धापाख्यः ज्ञानमाला भजन खलःपाखें ज्ञानमाला भजन न्ह्यब्वःगु खः ।