रञ्जना लिपि कार्यशाला गोष्ठि

यल – नेपाल लिपि गुथि व येँ महानगरपालिकाया मंकाः ग्वसालय् रञ्जना लिपि कार्यशाला गोष्ठि जुल । पाटन क्याम्पसया सभाकक्षय् जूगु गोष्ठिइ थीथी प्यंगू ज्यापौ न्ह्यब्वःगु खः । गोष्ठिइ प्राध्यापक नापं अन्वेषक काशीनाथ तमोटं ‘रञ्जना लिपिया ऐतिहासिक पक्ष’ सम्बन्धी ज्यापौ न्ह्यब्वयादीगु खःसा उकियात कयाः इतिहासकार नापं लिपि अन्वेषक डा. नयनाथ पौडेलं टिप्पणी यानादीगु खः ।

लिसें वय्कलं रञ्जना लिपिया उद्भाव नेपाःया भूमिइ जुइमाःगु तथ्य नं न्ह्यब्वयादीगु खः । अथे हे आशा सपूmकुथिया पुस्तकालयध्यक्ष नापं नेपाल लिपि गुथिया प्राज्ञ शरद कसाःनं ‘रञ्जना लिपिया आकार’या बारे ज्यापौ न्ह्यब्वयादीगु खःसा उगु ज्यापौयात कयाः सह प्राध्यापक नापं क्यालिग्राफर डा. मिलनरत्न शाक्यं टिप्पणी यानादीगु खः ।

नेपालभाषा केन्द्रीय शिक्षण विभागया प्रमुख सह प्राध्यापक डा. ओमकारेश्वर श्रेष्ठं न्ह्यब्वयादीगु ‘नेपाल लिपिया परिचय’ सम्बन्धी ज्यापौयात कयाः प्रा. डा. निर्मलमान तुलाधरं टिप्पणी यानादीगु खःसा विभागया हे उपप्राध्यापक राजनलाल जोशीं ‘रञ्जना लिपिया सांस्कृतिक पक्षयात कयाः न्ह्यब्वयादीगु ज्यापौयात प्रा. डा. चुन्दा वज्राचार्यं टिप्पणी यानादीगु खः ।

प्रदेश नं. ३ या सांसद राजेश शाक्यं उलेज्या यानादीगु गोष्ठिइ थःगु नुगःखँ तयेगु झ्वलय् भाषिक न्ह्यलुवा मल्ल के. सुन्दरं थः संयुक्त राष्ट्र संघय् वनागु इलय् नेपालं स्वतन्त्र राष्ट्रया रुपय् दर्ता यायेगु झ्वलय् रञ्जना लिपि दुथ्याकातःगु दस्तावेजया प्रतिलिपि ज्वना वयागु खँ न्ह्यथनादीगु खः ।

गुथिया दुजः निर्मल वज्राचार्यया संयोजनय् गोष्ठिइ नायः निरञ्जनरत्न ताम्राकार व न्वकु अनिल स्थापितं सहजकर्ताया भूमिका म्हितादीगु छ्यांजे पवित्र कसाःनं न्ह्याकादीगु खः । गोष्ठिपाखें पिहां वःगु निष्कर्षयात लिपि गुथिं याकनं पिथनेत्यंगु रञ्जना लिपिया वर्णमालाय् दुथ्याकेगु जानकारी गुथिं बिउगु दु ।