थँहितिया लोकंह्वाःम्ह समाजसेवी ताम्रकार मंत

येँ (नेपालभाषा टाइम्स) – येँ मनपा १७ वडास्ति थँहिति त्वाःया लोकंह्वाःम्ह समाजसेवी प्रेमदास ताम्रकार म्हिगः मंत । वय्कः ६५ दँ दुम्ह खः । थँहितिया मैत्री अध्ययन मण्डल पुस्तकालय लिसें नासःद्यःया छेँ दनेगु लागिं निर्माण समितिइ च्वनाः वय्कलं ज्या यानादीगु खः । अथे हे छत्रपाटी निःशुल्क चिकित्सालयय् च्वनाः नं वय्कलं सेवा यानादीधुंकूगु दु। थँहितिइ स्थानीय जनतायात नं माःगु इलय् माःकथं ग्वाहालि यानादीम्ह वय्कः उगु लागाया लोकंह्वाःम्ह व्यक्तित्व खः । वय्कःया छम्ह म्ह्याय् व छम्ह काय् दी । काय्-म्ह्याय्पिं विदेशय् वनाच्वंगु कारणं आः वय्कःपिं लिहां वयेकाः जक अन्तिम संस्कार याइगु खँ सीदुगु दु ।