प्रधान–सुनार प्रकरणय् छानबिन

येँ – सरस्वती प्रधान व रुपा सुनार सम्बन्धी मुद्दायात आः राष्ट्रिय मानव अधिकार आयोगं छानबिन याइगु जूगु दु । म्हीग थ्व प्रकरणयात कयाः प्रधानं मानव अधिकार आयोगय् वनाः उजुरी तयादीगु खःसा वय्कःया उजुरी दर्ता यासें आयोगया पदाधिकारीतय्सं आः थ्व प्रक्रियाय् थःपिंसं छानबिन यायेगु खँ कनादीगु खः ।

रुपा सुनार पक्षं थ्व प्रकरणयात कयाः प्रहरीइ उजुरी तःगु खःसा सरकारी वकिलं थुकी मुद्दा न्ह्याकेत प्रमाण मगाः धासें उकियात लित छ्वया हःगु खः । थ्व खँय् सुनार पक्षं माक्व छानबिन हे मयासे प्रधानयात पक्षपाती ढंगं प्रहरीं त्वःता छ्वत धकाः द्वपं बियाच्वंगु खः । आः धाःसा प्रधान थम्हं हे थ्व प्रकरणय् छानबिन याये माल धकाः मानव अधिकार आयोगय् उजुरी तःगुलिं वय्कःयात छानबिनपाखें बिसिउँ वन धकाः सुनार पक्षं बिउगु द्वपंया खण्डन जूगु खँ अभियन्तातय्सं धाःगु दु ।

प्रधानया समर्थनय् सक्रिय जुया–च्वंपिं अभियन्तातय्सं धाः कथं आः सुनार विरुद्ध थीथी कानुनी प्रक्रियाय् वनेगु नं तयारी जुयाच्वंगु दु । प्रधान विरुद्ध वय्कलं यानादीगु थीथी
ज्याखँयात आधार दयेकाः वय्कः विरुद्ध मुद्दाय् वनेगु तयारी जुयाच्वंगु खँ धाःगु दु । वय्कलं प्रधानयात मखुगु द्वपं बियाः दुःख बिउगु, वय्कःया स्वीकृति मकास फोन टेप याःगु, टेप याःगु फोन वार्तायात स्वीकृति मकासे टंकन याःगु, पीसीआर टेस्ट मयासे थःगु छेँय् दुहां वःगु, पत्रकार म्हसीकापौया दुरुपयोग याःगु, सरकारं जारी याःगु निषेधाज्ञायात पालना मयाःगु लगायत बागू दर्जन स्वयां अप्वः द्वपं बिसें मुद्दा तयेगु तयारी जुयाच्वंगु खँ धाःगु दु ।

मेखे प्रधानयात न्याय बीके नु धकाः हस्ताक्षर संकलनया ज्या नं निरन्तर न्ह्यानाच्वंगु दु ।