बुराबुरिपिंत भत्ता इनेगु ज्याय् समस्या

येँ- देय्या बुराबुरिपिंत स्थानीय निकाय मार्फत सरकारं बीगु याना वयाच्वंगु विशेष सामाजिक सुरक्षा भत्ता इनेगु ज्याय् व्यावहारिक समस्या जुयाच्वंगु खँ येँ मनपाया जनप्रतिनिधिपिंसं धाःगु दु । म्हिगः येँय् जूगु सामाजिक सुरक्षा सम्बन्धी अभिमुखीकरण ज्याझ्वलय् जनप्रतिनिधि लिसें मनपाया प्रशासन प्रमुखपिंसं नं उगु खँयात स्वीकार
यानादीगु खः ।

भत्ता काइपिं बुराबुरिपिंसं बैंकिङ कारोबार मसिउगुलिं वडा कार्यालय मार्फत बीगु ध्यबा कायेत थाकुयाच्वंगु खँ धाःगु दु ।
येँ मनपाया प्रवक्ता लिसें १५ वडाया वडाध्यक्ष ईश्वरमान डंगोलं थ्व सम्बन्धी निर्देशिका छ्वासुकेमाःगु बिचाः तसें बैकिङ कारोबार मसिउपिं, सयेके नं मफइपिं बुराबुरिपिनि नामय् हे बैंक खाता चायेकेगु व्यवहारिक मजूगु खँ स्पष्ट यानादिल । प्रवक्ता डंगोलं फुपिंत जक बैंकय् छ्वयेगु व मफुपिंत ल्हातय् हे ध्यबा तया बीकथं नियमावली सुधार यायेमाःगु बिचाः नं न्ह्यःने तयादिल ।

उकथं हे मनपाया प्रमुख प्रशासकीय अधिकृत केदार न्यौपाने, प्रशासन विभाग प्रमुख नमराज ढकाल व राष्ट्रिय परिचय पत्र तथा पञ्जीकरण विभागया निर्देशक जनराज भट्टं नं सामाजिक सुरक्षा भत्ता इनेगु निंतिं माःगु सुधार यायेमाःगु खँ धयादिल ।

सरकारं बुराबुरिपिंत बीगु थ्व भत्ता उमिगु नामय् बैंक खाता हे चायेकाः उकी तया बीगु यानाच्वंगु दु । तर उमेर वनेधुंकूपिं बुराबुरिपिं बैंकतय् तकं वने मफुगु कारणं थ्व व्यवस्था व्यवहारिक मजूगु खँ पिहां वयाच्वंगु खः ।