ने. सं. ११४४ कौलाथ्व षष्ठी -

बन्दं स्वनिगलय् सामान्य प्रभाव

येँ – सुरक्षाकर्मीतय् तःधंगु उपस्थितिया दथुइ न्ह्यानाच्वंगु आम हडतालं स्वनिगलय् छुं छुं प्रभाव लाकूगु दु । प्रचण्ड–माधव पक्षं कन्हय् प्रधानमन्त्री केपी ओलीं यायेत्यंगु शक्तिप्रदर्शन पिने जिल्लां मनू वयेत पंगः थनेगु ताः तयाःगु थौं याःगु आमहडतालया कारणं स्वनिगलय् नं भचा प्रभाव लाःगु खनेदुगु खः ।

बन्दया कारणं लँय् गाडी म्हो जक चले जुयाच्वंगु दुसां पसःत जुलुस पिहां वःथाय् बाहेक अप्वःथाय् चालाच्वंगु दु । स्कूलत धाःसा पूर्णरुपं बन्द जूगु दु । नगर दुने मोटरसाइकल, ट्याक्सी बांलाक हे चले जुयाच्वंगु दु । सार्वजनिक सवारी साधन धाःसा बांलाक चले जुइमफु । मू मू सतकय् प्रदर्शनकारीतय्सं गाडीयात पनेगु कुतः यानाच्वंगु दु । थ्व झ्वलय् छुं छुं थासय् प्रहरी व प्रदर्शनकारी दथुइ झडप नं जूगु दु । प्रदर्शनकारीतय्सं सुथय् न्हापां ग्वंगःबुँइ छगः ट्याक्सी च्याकाबिउगु दु । स्वनिगलं पिहां वनेत्यंगु छुं छुं सार्वजनिक सार्वजनिक सवारी साधनयात प्रहरीं स्कर्टिङ हे यानाः नं नागढुंगा कटे याकूगु दु ।

आम हडतालया निंतिं प्रचण्ड निसें यक्व धयाथें नेतात हे सतकय् कुहां वयाच्वंगु दु । बन्दया आह्वान यासें सतकय् कुहां वःम्ह नेतृ अष्टलक्ष्मी शाक्ययात धाःसा सुथय् हे प्रहरीं ज्वंगु दु । प्रहरीं सछिम्हं मल्याक नेता कार्यकर्तातय्त ज्वनेधुंकूगु दु ।

सरकारं थौंया बन्द निस्तेज यायेत यक्व ल्याखय् सुरक्षाकर्मी सतकय् क्वत हयातःगु दु । मेखे आम जनता नं बन्द हडतालया विपक्षय् दुगुलिं नं थौंया बन्दय् तःधंगु प्रभाव लाके फुगु खनेमदु । न्हापा यक्व हे जुइगु बन्दया कारणं सास्ती नयेधुंकूपिं सर्वसाधरण थौंकन्हय् छुं नं कारणं जुइगु बन्दया पक्षय् खनेमदु । उकिं प्रधानमन्त्रीया पलाःया विरोधी हे जूपिंसं नं बन्दया खँय् नं विरोध हे प्वंकेगु यानाच्वंगु दु । सर्वसाधरण मनूत बन्दया अवज्ञा यानाः हे सतकय् मोटरसाइकल ज्वनाः पिहां वयाच्वंगु दु ।