फुटबल कासामि विमल घर्तीमगरया केहेँयात स्याःगु द्वपं लानाच्वंम्हेसिन सफाइ

नवलपरासी (रासस)- राष्ट्रिय फुटबल कासामि विमल घर्तीमगरया केहेँ मनिषा घर्तीमगरयात स्याःगु द्वपं लानाच्वंम्ह आशिष धाइम्ह रुद्रनारायण चौधरीयात अदालतं सफाइ बिउगु दु ।

अदालतं मनिषा यग्गाना सीगु धासें जिल्ला अदालत नवलपरासी सफाइ बिउगु खः । वि.सं. २०७३ जेठ १३ गते मनिषा थःगु हे छेँय् बर्दघाट –८ य् यग्गाना सिनाच्वंगु अवस्थाय् लुइकूगु खः । उबलय् वया प्रेमी आशिषं हत्या याःगु धासें प्रहरीं मुद्दा दायर याःगु खः ।
पोस्टमार्टम रिपोर्टय् चिकित्सकतय्सं मनिषा यग्गाना सीगु खँ न्हयथनातःगु दु ।

मनिषाया सीम्ह लुइवं प्रहरीं आशिषया २१ न्हु तक अनुसन्धान यानाः मुद्दा तःगु खः । आशिष लिसे प्रेम सम्बन्ध दुगु व उमिगु कल डिटेल कथं निम्हेसिया दथुइ ल्वापु जूगु खँ प्रहरीं धाःगु दु । मतिनाय् ल्वापु पिहां वयेवं आशिषं मनिषायात स्याःगु द्वपं बिसें प्रहरीं मुद्दा दायर याःगु खः ।

जिल्ला न्यायाधीश रितेन्द्र थापां पुर्पक्षया निंतिं जेलय् लानाच्वंम्ह आशिषयात तुरुन्त त्वःतेत नं आदेश बिउगु दु ।