ख्वपया सापारु थुगुसी झःझः मधाः
ख्वप – ख्वपय् थुगुसी च्यान्हुयंकं जुइमाःगु सापारु नखःया झ्वलय् बहनी बहनी क्यने हयेमाःगु प्याखं करिब शून्य शून्य अवस्थाय् लाः वनाच्वंगु दु । स्वइपिं व प्याखं क्यनीपिं नं त्वाःत्वालय् पिने च्वनेगु म्हो जुया वंगुलिं नं थथे सापारु सापारु थें मच्वंगु खः ।
नासमना व दत्तात्रय त्वाः यानाः निगू थासय् मूल्यांकन पुचः तयाः ख्वप नगरपालिकां सापारुया मूल्यांकन यानाच्वंगु दुसां अन नं प्याखं क्यनीपिं मवःगुलिं दबू शून्य हे खने दयाच्वंगु खः । अन जुइगु प्याखंया प्रत्यक्ष प्रशारण भादगाउँ टेलिभिजनय् यायेगु ब्यवस्था यानातःगु खःसां आः तक टेलिभिजनय् घौछि निघौ हे जक अज्याःगु प्रत्यक्ष प्रशारण न्ह्यानाः दिनाच्वंगु क्यनातःगु दु ।
दत्तात्रय दुवातय् ९ वडाया वडा अध्यक्ष रविन्द्र ज्याख्वःया संयोजकत्वय् कार्यपालिकाया दुजः छोरिमैंया प्रजापति, रोशनी मैंया प्रजापति, सुलोचना छवाजू, मुक्तिसुन्दर जधारी, कान्छा बासुकला, राजेन्द्र श्रेष्ठ, बिष्णुगोपाल कुसी, कृष्णभक्त प्रजापति, पंचलाल लाछिमस्यू, लक्ष्मीनारायण दुवालपिं दुथ्याःगु मूल्यांकन समिति च्वनाच्वंगु दु ।
गुलिं इलय् ला उपिं न्ह्यः हे वयेकाः च्वनेमाःगु अवस्था तकं थ्यनाच्वंगु दु । म्हीग विश्वकर्मा नवदुर्गा प्याखं छगू क्यनेगु ज्या खःसा उपिं नं मूल्यांकन लिपा जक याकेगु कथं लिहां वन । अथेहे म्हिगः नं छथ्वःसिनं खिचा प्याखं छपु जक क्यनाः लिपा क्यनेगु यानाः लिहां वनाछ्वत । थथे जूगु कारण नं मनूत स्वःपिं तकं मदुगुलिं हे खः ।
छुं दँ न्ह्यः तक नं च्यान्हु च्याचा तक बाचा बाचा इलय् तकं प्याखं क्यं वइपिं प्याखं पुचःतय्त ज्वनाः ज्वनाः हे स्थानीय जनतां प्याखं क्यनेत बाध्य याइगु खः । तर थुगुसी धाःसा ख्वप नगरपालिकां अथे प्याखं क्यं वइपिंत सिरपाः हे बीगु व्यवस्था यानाः मूल्यांकन यानाच्वनं नं प्याखं हे क्यने महः ।
थथे जूगुया मू कारण मनूत आधुनिक सञ्चार माध्यमय् अप्वः भुले जुजुं वनाच्वंगुलिं जुइमाः धकाः अनुमान याना हःगु दु । कंस कृष्णाष्टमि कुन्हु तकया दुने थज्याःगु प्याखं जारी जुयाच्वनीगु खः । तर थ्व प्याखंत आः फासांफुसुं जुइवं थुगुसीया सापारु नखः न्हापांगु दिंया सापारु कुन्हु छन्हु जक तःजिक हनाः मेगु इलय् दतात्रय द्यः चाःहीकेगु, बाराहीद्यः चाःहीकेगु व लक्सःद्यः चाःहीकेगु थेंज्याःगु ज्याय् सीमित जूगु दु ।
LEAVE YOUR COMMENTS