धर्मकीर्ति अध्ययन गोष्ठि ५० दँ क्यन

येँ- धर्मकीर्ति बौद्ध अध्ययन गोष्ठि ५० दँ क्यंगु दु । अध्ययन गोष्ठिया स्वर्ण जयन्तीया लसताय् वंगु मंगलवाः भर्चुअल माध्यमं छगू ज्याझ्वः जुल । नेपालय् बुद्ध धर्मया प्रचार प्रसार यायेगु नापं ल्याय्म्ह पुस्तायात बुद्ध धर्मया ख्यलय् सहभागि यायेगु ताःतुनाः बुद्ध संवत् २५१५ (२०२८ साल) य् नीस्वंगु अध्ययन गोष्ठि ५० दँ क्यंगु लसताय् जूम प्रविधिया माध्यमं भर्चुअल ज्याझ्वः यानाः स्वर्णजयन्ती हंगु खः ।

गोष्ठिया उपाध्यक्ष श्रद्धेय अनागरिका वीर्यवति गुरुमांपाखें त्रिरत्न गुण अनुस्मरण यानाबिज्यासे न्ह्याःगु ज्याझ्वलय् गोष्ठिया छ्याञ्जे लोचनतारा तुलाधरं लसकुस यानादीगु खः ।

गोष्ठिया अध्यक्ष श्रद्धेय धम्मावती गुरुमांपाखें आशिवर्चन बियाबिज्याःगु ज्याझ्वलय् थीथी बौद्ध संघसंस्थाया प्रतिनिधिपिंसं भिंतुना न्वचु बियादीगु खः ।

ज्याझ्वलय् अखिल नेपाल भिक्षु महासंघया महासचिव भिक्षु कोण्डन्य महास्थविर, अन्तर्राष्ट्रिय भिक्षुणी संघया ञाणवती गुरुमां, लुम्बिनी बौद्ध विश्वविदालयया उपकुलपति प्रा. डा.हृदयरत्न वज्राचार्य, नेपाल परम्परागत बौद्ध धर्म संघया नायः प्रा. डा. नरेशमान वज्राचार्य, युवा बौद्ध समूहया नायः मदनबहादुर तुलाधर, युवक बौद्ध मण्डल, नेपालया अध्यक्ष मय्जु अरणीतारा वज्राचार्य, थेरवाद बुद्धिष्ट एकेदेमिया महेन्द्र शाक्यं अध्ययन गोष्ठि न्यय्दँ क्यंगु लसताय् भिंतुना न्वचु बियादीगु खः ।

अध्ययन गोष्ठियात थौंया अवस्थाय् तक थ्यंकेत धम्मावती गुरुमांयात मदिक्क ग्वाहालि याना वया च्वनाबिज्याम्ह मदुम्ह श्रद्धेया भिक्षु अश्वघोष महास्थवित र मा गुणवतीया गुणानुस्मरण नं याःगु खः । धर्मकीर्ति विहार संरक्षण कोषया छ्याञ्जेलिसें विहारया संस्थापक दुजः मय्जु प्रफुल्लकमल ताम्राकारं वसपोललिसें अध्ययन गोष्ठियात थौंया अवस्थाय्तक थ्यंकेत थीथीकथं ग्वाहालि याना वयादीपिं दाता, उपासक, उपासिका व ग्वाहालिमिपिनिगु गुणानुस्मरण यानादीगु खः ।

भिक्षु राहुल महास्थविर व भिक्षु पञ्ञासारपाखें नं भिंतुना बियाबिज्याःगु ज्याझ्वलय् गोष्ठिया संस्थापकपिं सचिव वरदेश मानन्धर, अमिरमयाँ शाक्य, मिना तुलाधर, संस्थागत रुपं पूर्ण कार्यसमिति गठन लिपा थीथी ज्यासना पुचलय् सचिव जुयादीपिं सह प्रा. मदनरत्न तुलाधर, अमृतरत्न ताम्राकार, अरुण सिद्धि तुलाधर, इन्द्रकुमार नकःमि, रमाशोभा कंसाकार संस्थापकलिसें वर्तमान कार्यसमितिया दुजः उर्मिला ताम्राकार, संस्थापकपिं डा. रिना तुलाधर, डा. सुमनकमल तुलाधरपिंसं स्थापनाकालनिसें थःथःगु कार्यकालय् जूगु थीथी गतिविधियात कयाः नुगःखँ तयादीग खः ।

ज्याझ्वलय् गोष्ठिपाखें न्ह्याका वयाच्वंग शनिवाःपतिकं न्ह्याका वयाच्वंगु कक्षाया संयोजक लिसें उपाध्यक्ष इन्दावती गुरुमां नं सुभाय् देछानाबिज्याःगु खः ।