मरुसतः दयेकेगु ज्या न्ह्यात

२०७२ सालया तःभुखाय् दुना वंगु मरुसतः (काष्ठमण्डप) पुनर्निर्माणया ज्या सोमवाःनिसें न्ह्यात । सोमवाः सुथय् मरुसतःया न्ह्यःने छगू क्षमा पुजा यासें पुननिर्माण ज्या शुभारम्भ याःगु खः । उकी बौद्ध परम्परा कथं सर्वज्ञरत्न वज्राचार्यं व हिन्दू परम्परा कथं महेश्वर जुजुं पुजा यानादीगु खः ।

क्षमा पुजाय् पाहां कथं झाःम्ह पर्यटन, नागरिक उड्डयन तथा संस्कृति मन्त्री रविन्द्र अधिकारीं मरुसतः दयेकेगु ज्या सुरु जूगुली लसता प्वंकुसें थ्व ज्या आः वइगु स्वदँया दुने सम्पन्न यायेत आग्रह यानादिल । वय्कलं आः वइगु जेठ १५ गते लानिपुखूया पुनर्निर्माण नं सुरु जुइगु खँ कनादिसें आः दयेकाच्वंगु गद्दी बैठक असार १३ गते उलेज्या याये जीक सिधयेकेत निर्देशन नं बियादिल ।

सन् २०२० य् पर्यटन वर्ष माने यायेगु व उगु दँय् १५ लाख पर्यटक नेपाः दुकायेगु ग्वसाः दुगु खँ कँसें अबले तक थनया अधिकांश सम्पदा धस्वाके हे माःगु खँय् नं वय्कलं बः बियादिल । येँ महानगरपालिकाया मेयर विद्यासुन्दर शाक्यं मरुसतः पुनर्निर्माण ज्या न्ह्यात धाःसां तत्काल फिल्डय् छुं खने दइ मखु तर दुने दुने यायेमाःगु ज्या धाःसा तीव्र रुपं सुरु जुइ धयादिल ।

वाङ्मय शताब्दीपुरुष सत्यमोहन जोशीं मरुसतः नेवाः मौलिक विधिं दयेकेत सुझाव बियादिल । काष्ठमण्डप पुनर्निर्माण समितिया नायः लिसें प्रदेश सांसद राजेश शाक्यं सकस्यां अपनत्व ग्रहण याकाः मरुसतः दयेकेगु खँ कनादिसें थुकिया बारे समितियात माःगु सुझाव बियादीत सकसितं आह्वान यानादिल ।