पशुपतिइ जुम्बा डान्स बन्द

येँ (नेपालभाषा टाइम्स)÷पशुपति क्षेत्रय् तसः जुइक संगीत हायेकेगु निसें फुटबल, भलिबल, ब्याडमिन्ट व साइक्लिङ तकया कासा म्हितेगु ज्या याःगुलिं आः अज्याःगु ज्याय् प्रतिबन्ध तःगु दु । पशुपति क्षेत्र विकास कोषं वंगु असार २८ गते छगू निर्णय यासें थज्याःगु गतिविधिइ म्हिगःनिसें पूर्ण रुपं प्रतिबन्ध तयाबिउगु दु ।

कोषं जीवजन्तुनिसें साधुसन्तया ध्यान व पुजाय् तकं पंगः वःगु धासें थ्व निर्णय यायेमाःगु खँ धाःगु दु । पशुपति क्षेत्रया भण्डारखाल, श्लेष्मान्तक वन, मृगस्थली शिव व पार्वतीया क्रिडास्थल खः धासें थ्व थाय्यात विशुद्ध धार्मिक व आध्यात्मिक ध्यान, योग यायेगु थाय्या रुपय् विकास यायेगु खँ नं कोषं धाःगु दु ।

पशुपति क्षेत्रय् न्हिथं सुथय् जुइगु थीथी कथंया कासा, जुम्बा डान्स, योगया नामय् जुइगु अप्राकृतिक क्रियाकलाप विरुद्ध यक्व गुनासो वःगुलिं उकी प्रतिबन्ध तःगु खः । थज्याःगु ज्यां अनया मृग, माकः लिसें मेपिं पशुपन्छीयात तकं लिच्वः लाःगु खँ धाःगु दु ।