प्यंगू हवाइ रुट बीगु सम्भावना
येँ – नेपाः दुहां वइगु हवाइजहाजयात आः न्हूगु हवाईमार्ग चूलाइगु सम्भावना ब्वलंगु दु । न्हूगु हवाईमार्गया निंतिं भारतीय प्रधानमन्त्री नरेन्द्र मोदीं माःगु ज्या यायेत थःगु देय्या सम्बन्धित अधिकारीतय्त निर्देशन बियादीगु दु । नेपालं नेपालगञ्ज, जनकपुर, भैरहवा व विराटनगर जुयाः नं अन्तर्राष्ट्रिय विमान दुहां वयेके बीगु निंतिं अनुमति बीत भारतयात माग यानाच्वंगु खः ।
थौंकन्हय् सिमरा जुयाः वयेगु छपु जक हवाई मार्ग दु ।न्हूगु हवाई लँपु दत धाःसा भैरहवा, पोखरा व निजगढय् दयेकाच्वंगु अन्तर्राष्ट्रिय विमानस्थलय् विमान दिकेत पिनें वइगु विमानयात चीहाकःगु लँपु जूवनी ।नेपाः भ्रमणय् वःम्ह भारतीय प्रधानमन्त्री मोदीलिसे जूगु वार्ताया झ्वलय् प्रधानमन्त्री केपी ओलीं न्हूगु लँपुया निंतिं अनुमति बीमाःगु खँ ल्ह्वनादीगु खः ।
प्यदँ न्ह्यः मोदी नेपाः वःबलय् नं थ्व विषयय् खँ जूगु खःसां उबलय् छुं सहमति मजूगु खः ।थः समकक्षी मोदीलिसे मंकाः पत्रकार सम्मेलनय् प्रधानमन्त्री केपी ओलीं धयादीगु खः, ‘छुं न्हि न्ह्यः जि भारत भ्रमणय् वनाबलय् नं हवाइ ट्राफिक सहज यायेत प्यंगू थप न्हूगु हवाइ प्रवेश विन्दू बीत इनाप यानागु खः ।
थ्व विषय भारतं याकनं सकारात्मक निर्णय काइ धयागु आशा याना ।’सन् २०१६ या डिसेम्बरय् जूगु सहसचिवस्तरीय बैठक धुंकाः निगुलिं देय्या प्राविधिक समितिया बैठक च्वनेगु निर्णय जूगु खःसा थ्व बैठक धाःसा आःतक च्वनेमफुनिगु खँ नेपाल नागरिक उड्डयन प्राधिकरणं धाःगु दु । नेपालगञ्ज जुयाः वइगु लँपुइ भारतया छगू सैनिक अड्डा लाःगुलिं भारतं थ्व सैनिक अड्डाया च्वं विमान ब्वयेके बीत आनाकानी यानाच्वंगु खँ निर्देशक बरालं धयादीगु दु ।
LEAVE YOUR COMMENTS