थौं देशय् विविध विपदत थितुमतुं थियाः श्रृंखलाबद्ध कथं वयाच्वंगु दु । कोरोना संक्रमणया विपद्, प्राकृतिक विपद् अले कठोर राजनीतिक विपद् । गुगुं नं देय् पूर्णतया विपदं मुक्त जुयाच्वने फइमखु । पूर्वअनुमान याये मफइगु, आकस्मिक प्राकृतिक प्रकोप वयाच्वनी । भुखाय् थेंज्याःगु प्रकोपं घौछि, बाघौया दुने हे धनजनया अपार क्षति यानाबी । वंगु छुं दँ न्ह्यः वःगु महाभूकम्पपाखें नेपाःमितय्सं कटु विभत्स अनुभव यायेधुंकल । आः हालय् मेलम्चीइ खुसि बाः वयाः तःधंगु क्षति याःगु दु । सलंसः मनूत घरवारविहनी जुयाः नयेगु, च्वनेगुया विकट समस्याय् लाःगु दु । मेलम्ची बजाः छगुलिं हे लखय् दुनाः ध्वस्त जूगु खनेदु ।

छगू बुखँ वःगु दु । मेलम्ची बजाःया छम्ह करोडपति साहु हालय् वःगु भिषण खुसिबाःया कारणं नांगां जूगु दु । थथे हे मेलम्चीवासी अधिकांशया छेँ बुँया बेठेगान जुयाः भविष्य हे अन्धकारय् लाःगु खँ पिहां वयाच्वंगु दु । खतुं । थौंकन्हय् वर्षायामया ई । अति वर्षा जुइगु, खुसिबाः वइगु, अले चलः वनीगु प्राकृतिक घटना दुर्घटनात जुयाच्वनी । थुकिया लागि इलय् हे फक्व सतर्क जुइमाः ।

खतुं प्राकृतिक प्रकोप आकस्मिक जुइ, थ्वपाखें बचे जुइ फइमखु । थ्व भाग्यया खेल जुइ धइगु परम्परागत विश्वास जुइ । तर अथे मखु । प्राकृतिक प्रकोपपाखें सुरक्षित गथे यानाः जुइ फइ धइगु अनेक वैज्ञानिक सोच, उपायत वयेधुंकूगु दु । वैज्ञानिकतय्सं अझ थ्व ख्यलय् अनेक खोज अनुसन्धानत न्ह्याकाच्वंगु दु । मौसमया पूर्वानुमान सुचं बियाः प्राकृतिक प्रकोपपाखें मनूतय्त सतर्क व सुरक्षित याये फुगु विधित वयेधुंकल । थौंकन्हय् गुलिखे प्राकृतिक प्रकोप, दुर्घटनात वातावरणीय असन्तुलनया लिच्वः खः धइगु नं निष्कर्ष वयेधुंकल । खुसिया नापनापं बजाः, नगर, वस्ती स्थापित यायेगु गुलितक सुरक्षित जुइ ? थ्व बारे सम्बन्धित विशेषज्ञतय्सं बांलाक अध्ययन यानाः राय बीमाल । केन्द्रीय सरकार, स्थानीय सरकारं नं गनं बजाः, बसोबासया विकास याये न्ह्यः अनया प्राकृतिक, भौगोलिक, स्थिति छु खः विचाः याये माल । मनूतय्त थज्याःगु थासय् भौगोलिक, प्राकृतिक अनुकूलताया चिउताः मतसे बसोबास, बजाः स्थापना याके बी मजिल ।

भूगर्भविद्तसें पहाड पहाडय् वइगु चलःया जोखिम बारे अनुसन्धान यासे पहाडी जनतायात सतर्क यायेमाः । पहाड, वनजंगलय् वातावरणीय विनासया कारणं नं अनेक प्राकृतिक दुर्घटना जू । वातावरणविद्तय् धापू दु । पिनें स्वयेबलय् प्राकृतिक प्रकोप खनेदुसां गुलिखे प्राकृतिक दुर्घटनात मानवीय अदूरदर्शीता, विवेकहीनता, असचेतताया कारणं नं जुयाच्वंगु खनेदु । आः मेलम्चीवासीतय्त न्हूगु थासय् स्थानान्तरण याये मालीगु स्थिति खनेदु । तर न्हूगु थासय् प्रतिस्थापन याये न्ह्यः जःखःया सम्भावित खतरायात ध्यानय् तयाः यायेमाः । थुकी सम्बन्धित विशेषज्ञतय् आवश्यक सल्लाह, सुझाव कायेमाः । सुझावयात पालना यायेमाः । थौंया विपदं कन्हय् गथे सुरक्षित जुइगु धइगु ज्ञान काये फयेमाः ।

आः वल कोरोना संक्रमणया विषयया खँ । थ्व विपद् थौं, म्हिगःया मखु । नं थ्व गुगुं स्थानीय विपद् जक खः । थ्व विपद थौं संसारन्यंकंया जुयाच्वंगु दु । नेपाः नं थौं थ्व विपदय् चुर्लुम्म हे डुबे जुयाच्वंगु दु । विपद् जुल । वल । जरुर थ्व दुर्भाग्यया खँ खः । तर विपद्यात दुर्भाग्य खंकाः ल्हाःतुति मसंकुसे सुम्क च्वनां विपद् दीमखु । झं न्यना वनी । उकिं विपद्या खँ मखु, विपद्या गुकथं सामना यात, वयात पनेत, वयात अन्त्य यायेत छु छु कुतः यात, जिम्मेवारी पूवंकल व महत्वपूर्ण जुइ । मूल्यवान जुइ ।

कोरोना जूपिंत उपचार यायेगु सुविधा माः । व महासंक्रमणया इलय् महाआवश्यकता खः । जुइ । तर कोभिडया विपद्यात अन्त्य हे यायेत खोप हे अन्तिम अस्त्र खः, विश्लेषकतय्सं धयाच्वंगु दु । जनतां नं थःगु असुरक्षा, भय्, त्रासं पिहां वयेत खोपया आशा यानाच्वंगु दु । तर दुःखया खँ । सरकारं थौं जनतायात कोभिडया खोपया विषयय् जनतायात विश्वास बी फयाच्वंगु मदु । याकनं वइ । खोप हयेगु खँय् सकारात्मक प्रगति जुयाच्वंगु दु । प्रयास जारी । थज्याःगु हे मचा म्हितकेगु खँ ल्हानाः जनताया म्हुतुप्वाः तिकेत स्वयाच्वंगु दु ।

लखौं ज्येष्ठ नागरिकतय्त न्हापांगु मात्राया खोप बिल । निगूगु मात्राया खोप बेठेगान । जनताया स्वास्थ्यप्रति थ्व खेलवाड मखुला ? छगू अन्तर्वार्ताय् वर्तमान स्वास्थ्यमन्त्री धाइ । खोप धइगु बिस्कुट ला ? बजारय् वनाः तुरन्त न्याना हयेत ? गबलें फलाना देशं थुलि लाख खोप वइगु जुल, गबलें फलाना देशं थुलि वइगु जुल । हल्ला याइ । एफएमय् छम्ह सम्बन्धित डाक्टरं धाइ, ‘पत्राचार तःथाय् जुयाच्वंगु दु । तर । लिसः मवःनि । लिसः वइ । आशा याये ।’ थज्याःगु हे मृगतृष्णा जुयाबी खोप ।

‘ध्यबा पुलागु खोप नं भारतं मबिउनि । निगू पक्षय् खँ जुयाच्वंगु दु । आः वइ । विश्वास याये ।’, आः वइ । विश्वास याये । स्वास्थ्यमन्त्रीं धाइ । ध्यबा पुलागु खोप हे काये मफु । राष्ट्रपतिजुं भारतया राष्ट्रपतियात ग्वाहालिया निंतिं च्वःगु पत्रया इज्जत ग्व ?

आः वइ राजनीतिक कोरोनाया खँ । देशं थौं भोगे यायेमाःगु राजनीतिक कोरोनाया कारणं देय् थौं भेन्टिलेटरय् लानाच्वंगु दु । श्वासप्रश्वासया कठिनाइं पीडित । राजनीतिक कोरोना भाइरसतसें न्हू न्हूगु रुप हिलाः खेल म्हिताच्वंगु दु । स्थितियात झं झं स्यंकाच्वंगु दु । थ्व कोरोना भाइरसतसे थःत द्यः खंकाः अभिमान यानाच्वंगु दु । थुमित ध्वस्त यायेगु खोप छु खः ? जनतां विचाः यायेमाल । ईया माग जुइ ।

सम्बन्धित बुखँ

LEAVE YOUR COMMENTS