क्वः सिनाच्वंगु खन धाःसा होशियार !

येँ – स्वनिगलय् क्वःयाके बर्डफ्लु लुइवं सतर्क जुइत चिकित्सकतय्सं धाःगु दु । छुं न्हि न्ह्यः तिनि येँय् स्वसः स्वयां अप्वः क्वः सीगु खः । थनया ब्रिटिश दूतावास व नारायणहिति दरवारय् च्वंपिं क्वः सीवं दूतावासया अधिकारी व नारायणहिति दरवारं क्वः सीगु बारे पशु सेवा विभागयात जानकारी याकूगु खःसा परिक्षण लिपा थ्व क्वःत फुक्कं बर्डफ्लु जुयाः सीगु पुष्टि जूगु खः ।

सम्बन्धित चिकित्सकतय्सं गनं क्वः सिनाच्वंगु लुत धाःसा वयात मथीत नं इनाप याःगु दु । चिकित्सकतय्सं यदि थी हे माःसा एन–९५ मास्क व सर्जिकल पंजा न्ह्यानाः जक थीत व तुरुन्त ल्हाकेत इनाप याःगु दु । लिसें सीपिं क्वःयात लाथेपाथे ढंगं लँय् वांमछ्वयेत नं इनाप याःगु दु । चिकित्सकतय्सं क्वःयाके खनेदुगु बर्डफ्लु नियन्त्रण यायेत थाकुइगु धासें होसियार जुयाः च्वनेत नं सतर्क याःगु दु ।

क्वः छेँय् लहीम्ह पंक्षी मखुगुलिं क्वःपाखे होशियार जुइमाःगु खँ धाःगु दु । नेपालय् छेँय् लहीपिं पंक्षीयाके बर्डफ्लु खनेदुसां नं छेँ लमहीपिं पंक्षीयाके धाःसा थज्याःगु संक्रमण म्हो जक खनेदुगु धासें थुकिं यानाः बर्डफ्लुया संक्रमण न्यना वनेफइगु ग्याःचिकु ब्वलंगु दु । वंगु छुं न्हिं न्ह्यः जक येँया तार्केश्वर नगरपालिकाया व तोखा नगरपालिकाय् बर्डफ्लु खनेदुगु खः । वयां लिपा गोदावरी नगरपालिका व ख्वपया सूर्यविनायक नगरपालिकाय् बर्डफ्लु खनेदुगु खः ।

क्वःयाके बर्डफ्लु खनेदयेवं उकियात नियन्त्रण यायेगु बारे सहलह शुरु जूगु दु । क्वः छथाय् जक च्वनीम्ह पंक्षी मखुगुलिं संक्रमण न्यना वनेफइगु सम्भावना अप्वया वनाच्वंगु दु । आः तक बर्डफ्लु संक्रमण जूगु थासय् निःसंक्रमण यायेगु ज्या जुइधुंकूगु दु । तर अथे खःसां सर्तक जुयाच्वनेत पशुसेवा विभागं धाःगु दु ।