प्रहरीया गोलीं चन्द पुचःया छम्ह सित

येँ – सर्लाहीइ प्रहरीया गोलीं कयाः नेत्रविक्रम चन्द पुचःया छम्ह नेता सीगु दु । सीम्ह जिल्ला इन्चार्ज कुमार पौडेल जूगु खँ प्रहरीं धाःगु दु ।
प्रहरीया कथं लालबन्दीइ निगः मोटरसाइकलय् वःपिं प्यम्ह विप्लवया कार्यकर्ता व प्रहरी नापलायेवं भिडन्त जूगु खः । विप्लवया जिल्ला इन्चार्ज पौडेल सहितया पुचलं प्रहरीयात आक्रमण यायेवं जवाफी फायरिङय् लानाः पौडेल सीगु खः ।

घटना लिपा स्वम्ह विप्लव कार्यकर्ता जंगलपाखे बिसिउँ वंगु खः । प्रहरी विप्लवया कार्यकर्तां ज्वना वःगु नम्बर खुले मजूगु बाइक व ना. २२ प ६४ नम्बरया पल्सर बरामद याःगु दु । थ्वहे झ्वलय् महानगरीय अपराध अनुसन्धान महाशाखा, टेकुया पुचलं विप्लव पुचःया न्याम्हेसित ज्वंगु दु ।

ज्वंपिं रामेछापया पार्टी इन्चार्ज कुलदीप तामाङ, दोलखा इन्चार्ज यादव दाहाल, सेक्रेटरी विशाल जिरेल, विद्यार्थी संगठनया ताम्सालिङ ब्युरो अध्यक्ष मुकुन्द श्रेष्ठ व उदयपुर जिल्ला विद्यार्थी संगठनया अध्यक्ष विशाल तामाङ जूगु खँ प्रहरीं धाःगु दु ।

ज्वंपिं न्याम्ह मध्ये छम्ह कुलदीपयात ख्वपं ज्वंगु खःसा मेपिं प्यम्ह येँनं ज्वंगु खः । ज्वंपिंके विप्लव पुचःया थीथी पर्चा लूगु दु । विप्लव पुचलं म्हिगः बहनी येँय् मशाल जुलुस पिकायेगु घोषणा यानातःगु खः । उगु हे विरोध ज्याझ्वलय् ब्वति कायेगु निंतिं विप्लवया कार्यकर्ता स्वनिगलय् वयाच्वंगु अनुमान प्रहरीं याःगु दु ।