निम्हं स्वतन्त्र मेयरतय् छुच्चाम्हुतु जनतायात अपाच्य

येँ (नेपालभाषा टाइम्स)- छुं ई न्ह्यः तक सर्वसाधारण मनूतय् दथुइ हाई हाई जुयाच्वंपिं निम्ह स्वतन्त्र मेयरपिं येँया बालेन साह व धरानया हर्क साम्पाङ निम्हं वंगु छुं ई थुखेंनिसें धाःसा थः हे मतदातातय् आलोचनाया शिकार जुयाच्वंगु दु । थःपिनि ज्याया कारणं चर्चाय् वःसां वय्कःपिं निम्हं लिपांगु इलय् थःपिनि छुच्चा म्हुतु व व्यहोरां यानाः आलोचनाया शिकार जूगु खः ।

येँया मेयर बालेन साह वंगु निवाः न्ह्यः थः कलाः च्वना वंगु गाडीइ ट्राफिक प्रहरीं चेकजाँच यायेवं सामाजिक सञ्जालय् ‘सिंहदरवार च्याका बी’ धकाः बियादीगु धापूया कारणं चरम विवादय् लाःगु दु । लिसें वय्कलं कपन लागाय् सामाखुसि त्वपुना तःगु स्ल्या

ब तछ्यानाः खुसि खुले यानाः अलपत्र जुइक त्वःता बीवं स्थानीय मनूतय्सं वय्कःयात भोट बियाः त्याकागु गलत जुल धायेगु शुरु याना हःगु दु । थ्वहे झ्वलय् वय्कः सर्वसाधारणया सम्पर्कं नं तापाक च्वनेगु याना हःगु दु । शनिवाः केन्द्रीय मानन्धर संघं बसन्तपुलिइ याःगु धाः बाजं ब्वज्याय् वय्कःयात मूपाहां दयेकेगु धकाः दसिपतिइ नां तकं छापे याना तयेधुंकूगु खःसा अन्तिम इलय् वयाः वय्कःया हस्ताक्षर छगू तकं काये मफयाः दसिपतिइ छापे यायेधुंकूगु नां नापं हुइमाःगु अवस्था वःगु खः ।

मेखे बालेन साह थें हे कथि चुनाव चिं कयाः त्याःम्ह धरानया स्वतन्त्र मेयर हर्क साम्पाङ नं लिपांगु इलय् थःगु हे अभिव्यक्तिया कारणं आलोचनाया शिकार जुयादीगु दु । वृक्षारोपण अभियान धकाः कर्पिनि निजी जग्गाय् तकं सिमा पिउ वनेवं वय्कःयात साथ बीपिं म्हो जुया वंगु दु । छुं ई न्ह्यः तिनि थःगु आलोचना याःम्ह छम्ह मनूयात नं वय्कलं ज्वंके बिउगु खः । अथे हे धरानया हिन्दू अतिवादीतय्सं वय्कःयात थ्वहे इलय् क्रिश्चियनतय्त साथ बिउम्ह धकाः धार्मिक रुपं नं बदनाम यायेत स्वया हःगु खने दयाच्वंगु दु ।