मधेसी आयोगया जनजाति विरोधी वक्तव्य
येँ (नेपालभाषा टाइम्स)-जनजाति दुनेया तामाङ समुदायं द्वहं स्यानाः ला नःगु खँय् अतिवादी हिन्दूतय्सं विरोध यानाच्वंगु इलय् लाक्क मधेसी जनताया हकहित सुरक्षा यायेगु ताः तयाः सरकारं गठन यानातःगु मधेसी आयोगं ‘राष्ट्रिय जनावर सा’ स्यानाः नइपिंत कडा कारवाही यायेमाः धकाः वक्तव्य पिकाःगु दु ।
आयोगया सचिव रुद्रप्रसाद लामिछानें हस्ताक्षर यानाः थ्व वक्तव्य पित बिउगु खः । मधेसी आयोगं पित बिउगु थ्व वक्तव्य आदिवासी जनजाति विरोधी धापू जूगु खँ धाःगु दु । आयोगया थ्व वक्तव्ययात आदिवासी जनजातितय्सं कडा रुपं आलोचना याना हःगु दु ।
आयोगया वक्तव्यय् सुनसरीया धरानय् संवैधानिक प्रावधान अःखः सा व द्वहं स्यानाः सार्वजनिक रुपं भ्वय् याःगु धासें अज्याःगु ज्या याःपिंत कानुनी दायरा दुने हयाः कारवाही यायेमाः धकाः धयातःगु दु ।
आयोगं बिउगु जानकारी कथं आयोगया अध्यक्ष डा. विजय कुमार दत्तं सुनसरी घटनायात आयोगपाखें गम्भीरतापूर्वक स्वयाच्वंगु व उगु घटनाया दाषीयात कानुनी कारवाहीया दायराय् हयाः कारवाही यायेत आयोगं माःगु पहल याइ धयादीगु दु ।
मधेस आयोगया थ्व वक्तव्ययात जनजातितयय्सं धाःसा अनावश्यक व उत्पीडित दथुइ विभाजन हयेगु ज्या धकाः आलोचना याना हःगु दु । जनजाति नेता आङकाजी शेर्पां सामाजिक सञ्जालपाखें थ्व वक्तव्यया विरोध यानादीधुंकूगु दु ।
थौंकन्हय् भारतय् नं हिन्दुत्वयात मुद्दा दयेकाः राजनीतिक माहौल क्वाकेगु ज्या जुयाच्वंगु दु । उकिया लिच्वः नेपालय् नं लानाच्वंगु दु ।
वहे कारणं नेपालय् जुजुवादी पार्टी राप्रपां नं थ्व मुद्दायात ल्ह्वनाच्वंगु द्वपं लानाच्वंगु दु ।
आयोगयात आङकाजीया सुझाव
जनजाति नेता आङकाजी शेर्पां मधेसी आयोगया वक्तव्ययात कटाक्ष यासें आयोगं सा व द्वहंया ला नःगु सम्बन्धी मुद्दायात ल्ह्वनेगु पलेसा मधेसी जनताया अधिकार सुरक्षित जुइगु मुुद्दात ल्ह्वंसा जिउ धकाः सुझाव बियादीगु दु । वय्कलं आयोगया लागिं धकाः छुं बुँदागत सुझाव समेत सामाजिक सञ्जाल मार्फत बियादीगु दु, गुकी धयातःगु दु– मधेसी आयोगं थ्व इलय् मधेसी नागरिकयात सेना व प्रहरीइ नं समानुपातिक थाय् बीकेगु, सरकारी प्रशासनय् मधेसी जनतायात थाय् बीकेगु, मधेस लागाय् मैथिली, भोजपुर व अवधी भाय्यात सरकारी भाय्या मान्यता बीकेगु, मधेसी जनतायात राज्यपाखें याइगु विभेद मदयेकेगु, स्वास्थ्य, शिक्षा, रोजगारी थेंज्याःगु क्षेत्रय् मधेसी जनतायात प्राथमिकताय् लाकेगु मुद्दायात विशेष रुपं ल्ह्वनेगु ज्या याःसा बांलाइगु खः ।
LEAVE YOUR COMMENTS