संसफो सरकारय् वनेगु तयारी

येँ – एमाले व माओवादी एकीकरण जुयाः तःधंगु नेपाल कम्युनिष्ट पार्टी गठन जुइधुंकाः संघीय समाजवादी फोरमलिसे न्हापा स्यंगु राजनीतिक स्वापू नं हानं बांलाकेगु पहल सुरु जूगु दु ।

थुकिया लागिं संसफोयात नं संघीय सरकारय् दुत यंकेगु प्रक्रिया न्ह्याःगु दु । उकिया लागिं म्हिगः नेकपाया अध्यक्षपिं प्रधानमन्त्री केपी ओली व पुष्पकमल दाहाललिसे संसफोया अध्यक्ष उपेन्द्र यादव दथुइ खँल्हाबल्हा जूगु दु । खँल्हाबल्हा अतिकं सकारात्मक जूगु खँ धाःगु दु ।

उगु खँल्हाबल्हाय् ओली व दाहालं संसफोपाखें सरकारया नीति तथा कार्यक्रमय् दर्ता यानातःगु संशोधन प्रस्ताव लित कायेत इनाप यानादीगु खः । संसफों दर्ता याःगु संशोधन प्रस्तावय् धयातःगु खँत थःपिंसं आः वइगु बजेटय् सम्बोधन याये धकाः प्रधानमन्त्री ओलीं म्हिगः हे सदनय् न्ववानादीवं न्हिनय् संसफों थःपिनि संशोधन प्रस्ताव लित काःगु खः ।

अथे हे सरकारं यदि संविधान संशोधन यायेगु बचं बिल धाःसा थःपिं सरकारय् वनेत तयार दुगु खँ नं संसफो नेतां धाःगु दु । संसफोया थ्व प्रस्तावयात सम्बोधन यायेगु लागिं सरकारपाखें संविधान संशोधन बारे न्हापा याना तयागु बचं पूवंका वनेगु जुइ धकाः न्ववायेगु तयारी यानाच्वंगु खँ नं धाःगु दु । यदि सरकारपाखें थुलि बचं वल धाःसा संसफो सरकारय् वनीगु खँ सूत्रं धाःगु दु । उकिया लागिं संसफो दुने नं तयारी सुरु जूगु खँ सीदुगु दु ।

अथे हे सरकारं राष्ट्रिय जनता पार्टीयात नं सरकारय् वयेत इनाप याःगु दु । तर राजपां संविधान संशोधन बारे न्ववानां जक बचं वयां मयाः, लिखित हे वयेमाः धकाः अडान काःगुलिं समस्या वयाच्वंगु खँ धाःगु दु । लिखित सहमति हे वयेमाः धइगु खँय् नं राजपाय् निगू मत पिहां वःगु खँ सूत्रं धाःगु दु ।