प्रम दयेकेगु ज्या सर्वोच्चया मखु
येँ – प्रधानमन्त्री केपी शर्मा ओलीं सर्वोच्च अदालतयात लिसः बीगु झ्वलय् अदालतं प्रधानमन्त्री नियुक्ति याये मफइगु खँ धयादीगु दु । प्रधानमन्त्री ओलीं प्रतिनिधिसभा विघटनयात कयाः अदालतयात लिसः बीगु झ्वलय् सर्वोच्च अदालत थम्हं हे व्यवस्थापिका व कार्यपालिकाया भूमिका म्हिते मफइगु खँ धयादीगु खः ।
प्रम ओलीं लिसलय् धयादीगु दु, ‘विपक्षी शेरबहादुर देउवां माग दावी पेस यायेगु झ्वलय् थःत प्रधानमन्त्री यायेत तकं माग यानातःगु खनिं । अदालतं संविधान व कानुनया व्याख्या यायेगु खः, अदालत थम्हं हे व्यवस्थापिका वा कार्यपालिकाया भूमिका म्हिते फइ मखु, थ्व नितान्त राजनैतिक व कार्यपालिकाया प्रक्रिया खः ।’
प्रम ओलीं संविधानया धारा ७६ य् प्रधानमन्त्री नियुक्त यायेगु अधिकार राष्ट्रपति बाहेक मेपिंत बियामतःगु खँ नं लिसलय् धयादीगु दु । वय्कलं लिसलय् धारा ७६ या उपधारा (५) बमोजिम नियुक्त मजूम्ह सुं नं मनुखं प्रतिनिधिसभाय् विश्वासया मत दइ वा मदइ धइगु अवस्था दु वा मदु धकाः परीक्षण प्रतिनिधिसभा वा अदालतय् जुइगु गुगुं नं परिकल्पना यानातःगु मदु, २०१९ या संविधान वा २०६३ सालया संविधानय् थेंज्याःगु प्रधानमन्त्रीयात निर्वाचन यायेगु व्यवस्था विद्यमान संविधानय् तयातःगु मदु, थज्याःगुलिं विपक्षीं रिट निवेदनय् न्ह्यथनातःगु थेंज्याःगु संसदीय विशेषाधिकारया न्ह्यसः तकं न्ह्यानाच्वंगु मुद्दाय् आकर्षित जुइ मखु धयादीगु दु ।
वय्कलं नेपाःया शासकीय स्वरुप संघीय लोकतान्त्रिक गणतन्त्रात्मक संसदीय शासन प्रणाली जूगुलिं थुकी निर्दलीय अभ्यासया कल्पना यानातःगु मदु उकिं रिट निवेदनपिंसं दावी याःथें संसद व सरकार सञ्चालन यायेगु खःसा उकिं पञ्चायती व्यवस्था थेंज्याःगु निर्दलीयतायात हाकनं म्वाकेगु थें जुइ धकाः नं तर्क यानादीगु दु ।
अथे हे दलया नेतां प्रधानमन्त्रीया रुपय् थःगु दावी पेश याःगु अवस्थाय् दलया मेपिं छुं प्रतिनिधिसभाया दुजःपिंसं विपक्षी दलया नेतायात प्रधानमन्त्रीया रुपय् समर्थन यायेगु व अज्याःगु ज्या संसदीय प्रणालीइ सुनां नं कल्पना याये मफइगु खँ नं धयादीगु दु ।
उकथं हे वय्कलं कांग्रेसया नेता शेरबहादुर देउवायात सर्वोच्च अदालतं प्रधानमन्त्री नियुक्ति यायेत आदेश बिल धाःसा एमालेया अवस्था छु जुइ धकाः न्ह्यसः नं न्यनादीगु दु । सर्वोच्च अदालतं जारी याःगु कारण देखाउया लिसः बिसें वय्कलं न्यनादिल, ‘विपक्षीया माग पूवन धाःसा एमाले सत्तापक्ष जुइ कि प्रमुख प्रतिपक्षी दल जुइ ?’
प्रम ओली थम्हं विश्वासया मत नं काये मफइगु व वैकल्पिक सरकार नं गठन मजुइगु जूगुलिं थम्हं प्रतिनिधिसभा विघटन यानागु लिसः नं बियादीगु दु ।
LEAVE YOUR COMMENTS