सापारु चाःहिलीगु लँपुइ लाःगु तार व्यवस्थापन याइगु
ख्वप(नेपालभाषा टाइम्स)÷ ख्वप नगरपालिकां सापारु चाःहिलीगु लँपुइ लाःगु अव्यवस्थित तारया व्यवस्थापन याइगु जूगु दु । सापारु चाःहिलीगु लँपुइ लाःगु थनया विद्युत, टेलिफोन, इन्टरनेट, केबुल नेटवर्क लगायतया अव्यवस्थित तार व्यवस्थापन यायेत्यंगु खः ।
ख्वप नगरपालिकाया प्रमुख सुनिल प्रजापतिया अध्यक्षताय् च्वंगु बैठकं उगु निर्णय याःगु खः । नगर प्रमुख प्रजापतिया अध्यक्षताय् थुगुसीया सापारु नखःयात व्यवस्थित व मर्यादित रुपं संचालन व सम्पन्न यायेत सापारु चाःहिलीगु लँपुइ लाःगु तार व्यवस्थापन यायेगु विषयय् सम्बन्धित सरोकारवालातय् बैठकं उगु निर्णय याःगु खः ।
बैठकं थनया लोकंह्वाःगु सापारु नखः (जात्रा)यात व्यवस्थित व मर्यादित रुपं संचालन यायेत सम्बन्धित सरोकारवाला दक्वं पक्षं थःथःगु थासं माःकथंया ग्वाहालि यायेगु व सापारु चाःहिलीगु लँपु व महत्वपूर्ण थासय् च्वंगु विद्युत, टेलिफोन (टेलिकम)य इन्टरनेट व केबुलया तार चिइकेगु सहमति याःगु याःगु खः । बैठकं कन्हय् आइतवाः तकया दुने सकसिनं थःथःगु थासं तार व्यवस्थापन यायेगु व क्वःछिनातःगु ईया दुने तार व्यवस्थापन मयात धाःसा नगरपालिका स्वयम थम्हं चिइकेगु नं निर्णय याःगु दु ।
बैठकं अस्तव्यस्त जुइक थीथी प्रयोजनया निंतिं तयातःगु तारया व्यवस्थापनया समन्वय व अनुगमन यायेत वडा नं. ७ या वडाअध्यक्ष उशेक कवांया संयोजकत्वय् खुम्हेसिया छगू समिति नं गठन याःगु दु ।
LEAVE YOUR COMMENTS