विश्व सम्पदा दिवस न्यायेकीगु

येँ – थ्व हे वइगु बैशाख ५ गते विश्व सम्पदा दिवस नेपालय् नं थीथी ज्याझ्वः यासें हनीगु जूगु दु । विश्व सम्पदा दिवस तःजिक हनेगु नापं देय्या सम्पदास्थलया प्रचार प्रसार यायेगु उद्देश्यं छगू समिति नं नीस्वंगु दु । देय्या सम्पदायात जनस्तरं प्रचार प्रसार यायेगु ल्याखं ‘विश्व सम्पदा उत्सव मूल समारोह समिति’ नीस्वंगु खः । समितिया निर्देशन समितिया संयोजकय् येँ क्षेत्र नं ८ या प्रतिनिधिसभा सदस्य जीवनराम श्रेष्ठयात ल्यःगु दु । उगु समितिइ येँ क्षेत्र नं ७ या मेम्ह सांसद रामवीर मानन्धर, क्षेत्र नं. ७ (१)या प्रदेशसभा सदस्य वसन्त मानन्धर व येँ क्षेत्र नं ८ (१) या प्रदेशसभा सदस्य राजेश शाक्य च्वनादीगु दु ।

सांसद श्रेष्ठया संयोजकत्वय् नीस्वंगु समितिया सहसंयोजकय् येँ महानगरपालिकाया प्रमुख विद्यासुन्दर शाक्य, सचिवय् दिल्लीरत्न तुलाधर व कोषाध्यक्षय् विन्देश्वर श्रेष्ठ च्वनादीगु दु । झिंच्याम्हेसिया उगु समितिइ संचार संयोजनया भाला भीमसेन राजवाहकयात बिउगु दु । समितिं वइगु बैशाख ५ गते कुन्हु विश्व सम्पदा दिवस तःजिक हनेगु नपं थीथी कथंया रचनात्मक ज्याझ्वः याइगु जूगु दु । देशय् दुगु थीथी सम्पदायात अन्तर्राष्ट्रियस्तरय् थ्यंकेगु व उकिया प्रवद्र्धन यायेत समितिं सशक्त भूमिका म्हितीगु समितिया निर्देशन समितिया संयोजक सांसद श्रेष्ठं कनादिल । अथे हे वश्व सम्पदाया धलखय् दुथ्याःगु येँया बसन्तपू लाय्कू लागांनिसें मेगु विश्व सम्पदास्थल स्वयम्भूतकयात सम्पदास्थलया संरक्षण व प्रवद्र्धनया निंतिं नं समितिं ज्या याइ धाःगु दु ।