पत्रकार महासंघया ध्यानाकर्षण

येँ – सरकारं सार्वजनिक प्रशारण सम्बन्धी कानून न्ह्यःने न्ह्याकूगु धासें नेपाल पत्रकार महासंघं आपत्ति प्वंकूगु दु । महासंघं सरोकारवाला निकायया सुझावयात बेवास्ता यानाः ‘सार्वजनिक सेवा प्रशारणसम्बन्धी कानूनयात संशोधन व एकीकरण यायेत दयेकूगु विधेयक–२०७७’ न्ह्यःने न्ह्याकूगु धासें थःपिनिगु ध्यानाकर्षण जूगु खँ धाःगु दु ।

सरकार थम्हं लोकतन्त्रय् सार्वजनिक संचारमाध्यम संचालन मयायेगु धइगु विश्वव्यापी मान्यता व सार्वजनिक सेवा प्रशारणया आधारभूत सिद्धान्त अःखः सरकारी स्वामित्व व नियन्त्रणय् हे तयेगु प्रस्तावसहित वःगु विधेयकयात न्ह्यःने यंकूगु धासें उगु विधेयकयात कयाः महासंघं गम्भिर अहसमति प्वंकूगु दु ।

महासंघया महासचिव रोशन पुरीं छगू विज्ञप्ती जारी यासें सरकारी स्वामित्वय् दुगु संचारमाध्यम रेडियो नेपाल, नेपाल टेलिभिजनय् जनताया स्वामित्व कायम यायेगु व संघीय संसदप्रति जवाफदेही जुइकथंया विधेयक वयेमाःगुलिइ सरकारं हाकनं नं थःगु हे नियन्त्रणय् तयेगु उद्देश्यं विधेयक हयेगु प्रक्रिया न्ह्याकूगु धासें महासंघं आपत्ति प्वंकूगु खः ।
सरकारं आः हयेत्यंगु विधेयक २०७३ सालय् जारी याःगु राष्ट्रिय आमसंचार नीति अःखः जूग्ु व महासंघ लगायत सरोकारवाला निकायया असहमति दयेक दयेकं नं विधेयक न्ह्यःने यंकाः सरकारं अलोकतान्त्रिक व अनुदार चरित्र न्ह्यब्वःगु विज्ञप्तीइ धयातःगु दु ।

सरकारं न्ह्यःने हःगु विधेयकया परिभाषा, गठन, विधि, उद्देश्य, संरचना, नियुक्ति प्रक्रिया, प्रतिनिधित्वलिसें काम, कर्तव्य व अधिकार लगायतया प्रावधान सार्वजनकि प्रशारणया सर्वमान्य विपरित जूगु ठहर यासें महासंघं न्हापा हे बियातःगु सुझावया लिधंसाय् सम्बन्धित निकायलिसे सहलह व सहमतिकथं न्ह्यःने न्ह्याकेत नं महासंघं माग याःगु दु ।

सम्बन्धित बुखँ

LEAVE YOUR COMMENTS