च्याम्ह नकली राजस्व कर्मचारी ज्वन

येँ (नेपालभाषा टाइम्स)÷थःपिंत आन्तरिक राजस्व कार्यालयया कर्मचारी खः धकाः ठगे यानाच्वंपिं च्याम्ह मनूयात प्रहरीं ज्वंगु दु । उमिसं येँया बसपार्क लागाय् लाःगु होटेल व पसलय् दुहां वनाः ध्यबा म्हयेगु ज्या यानाच्वंगु खँ प्रहरीं धाःगु दु । प्रहरीं धाःकथं उमिसं अन न्यागू लाख तका स्वयां अप्वः ध्यबा ठगे याःगु खः ।

ज्वंपिं मीनबहादुर बिक, सिर्जना भट्टराई, सागरजंग लुहार, प्रमिसा तामाङ, दूधकला विक, अञ्जना तामाङ, राजीव विष्ट व डेविड धामी खः । उमिसं आन्तरिक राजश्व कार्यालयया कर्मचारीं थेंज्याःगु वसः पुनाः म्हसीकापौ नापं ज्वना वःगु खः ।

वंगु मंसिर २३ गते स्थानीय व्यवसायीतय्सं शंका वनाः प्रहरीयात खबर यानाः उमित ज्वंका छ्वःगु खः । उकी मध्ये निम्हेसिया डेरां आन्तरिक राजश्व कार्यालयया नक्कली स्टाय्म्प, लेटरप्याड, रसिद व परिचयपत्र नं बरामद याःगु दु ।

ज्वंपिनिगु विरुद्ध म्हिगः तक प्यम्ह व्यवसायीतय्सं लिखित जाहेरी बीधुंकूगु दुसा उमिसं ध्यबा ठगे याःपिं मेपिं व्यापारीतय्सं नं प्रहरीयात स्वापू तयाच्वंगु खँ धाःगु दु । ज्वंपिंत ठगी व कीर्तेसम्बन्धी कसुरय् अनुसन्धान जुयाच्वंगु दु ।

नेपालभाषा टाइम्स

च्वमिया मेमेगु

• चित्तरन्जन नेपालीयात लुमंकल
• मतया तार भूमिगत यायेगु ज्या बेवारिस
• निम्ह साहित्यकारया थौं बिचाः मुँज्या
• एमालेया संकल्प यात्रायात पहिचानवादीया हाथ्या
• शरणार्थी काण्डय् गुम्हेसित कुना हे तइगु