कःनिमाय् खने दत मौसमया लिच्वः

येँ – मौसमय् वःगु हिउपाःया लिच्वः कथं २ नम्बर प्रदेशया थीथी जिल्लाय् पिनातःगु कःनि बाली स्यंगु दु । वंगु कार्तिक महिनाय् पिउगु कःनि थौंकन्हय् पाके जुइमाःगु खः । तर पाके जूगु कःनिइ खालि स्यः जक जायाः कःनि धाःसा छगः हे मसःगु खँ स्थानीय किसानतय्सं धाःगु दु । थःपिनि बुँइ ह्वःगु कःनिमाया थ्व हालत खनाः कःनि पिउपिं किसानत ख्वये ला न्हिले ला जुयाच्वंगु दु । २ नम्बर प्रदेशया सर्लाही, बारा, पर्सा आदि जिल्लाया करिब १५० हेक्टर बुँइ किसानतय्सं कःनि पिउगु खः । थुकी मध्ये सुयागुं हे माय् कःनि मसःगु खः । थुकिं यानाः मा हे लिनाः वांछ्वये माःगु अवस्था वःगु दु । न्याला तक लः, साः आदि बियाः ब्वलंकूगु कःनिमाय् कःनि छगः हे मदुगु खनाः हीमीचाःपिं किसानतय्त आः थ्व बालीया लागिं काःगु त्यासा तकं गय् यानाः पुलेगु धकाः चिन्ता जूगु दु । उमिसं जिल्लाय् न्ह्याम्हेसितं पुसा मीगु अनुमति बियातःगु कारणं थ्व समस्या वःगु धकाः द्वपं बिउगु दुसां कृषिविद्तय्सं धाःसा मौसम व पर्यावरणय् वःगु हिउपाःया लिच्वः कथं थथे जूगु खँ धाःगु दु । पीडित किसानतय्सं प्रदेश सरकार समक्ष क्षतिपूर्तिया माग याःगु दु ।