ब्वनेकुथिया स्यनामिपिंत च्वसु च्वयेगु तालिम

किपू – किपू नगरपालिका नगर शिक्षा समितिपाखें स्यनामिपिंत च्वसु च्वयेगु तालिम बिउगु दु । नगरपालिकां हलिं नेवाः गुथि अन्तर्गतया वनस्पति अनुसन्धान कचा किपूया सहकार्यय् स्यनामिपिंत छन्हुया उगु तालिम बिउगु खः ।

किपू नगरपालिकास्थित राराहिल मेमोरियल स्कुलय् जूगु तालिमया उलेज्या नगर प्रमुख रमेश महर्जन व उपप्रमुख सरस्वती खड्कां मंकाःकथं गमलाय् बोधिचित्तया मा पिनाः यानादीगु खः ।

नगर दुने संचालन जुयाच्वंगु ब्वनेकुथिया माध्यमिक तहया स्यनामिलिसें नगरपालिका न्यंकं स्थानीय पाठ्यक्रम अध्यापनरत स्यनामिपिंत नेपालभाषां च्वसु च्वयेगु सम्बन्धी विशेष तालिम बिउगु खः ।

उपप्रमुख खड्कां थुकथंया तालिमं स्यनामिपिनिगु लेखन क्षमता अप्वयेकेत ग्वाहालि याइगु विश्वास प्वंकादिसें शिक्षा ख्यःया सुचं, जानकारीनापं अनुभव, शिक्षण विधि, पद्दति थवंथवय् कालबिल यायेत नं ग्वाहाल जुइ धयादिल । लिसें वय्कलं गुणस्तरीय शिक्षणय् नं ग्वाहालि जू वनीगु नापं थःपिनिगु वृत्ति विकासय् नं तालिमं ग्वाहालि याइगु आशा यानादिल ।

नगर प्रमुख महर्जनं देशय् व्याप्त जुयाच्वंगु भ्रष्टाचार विरुद्ध सकल विद्यार्थीतय्त सचेत याना यंकाः मस्तय्पाखें इमि अभिभावकयाथाय् तक थ्यंके स्यनामिपिंसं नवानाः व च्वयाः थःपिनिगु थासं महत्वपूर्ण भूमिका म्हितेमाःगु खँय् बः बियादिल ।

वरिष्ठ लेखक राजेन्द्र महर्जन व लोककवि राजभाई जकःमि श्रोत व्यक्तिकथं उपस्थित जुयादीगु ज्याझ्वलय् नगर शिक्षा समितिया दुजःलिसें वनस्पति अनुसन्धान कचा किपूया नायः प्रा. डा. धर्मराज डंगोलं तालिमया थीथी पक्षयात कयाः कुलादिसें वइगु दिनय् मेमेगु तहया स्यनामिपिंत नं थुकथंया तालिम नियमित रुपं संचालन यायेगु नीति दुगु खँ कनादिल ।

सम्बन्धित बुखँ

LEAVE YOUR COMMENTS