नेपाःया अन्तर्राष्ट्रिय बदनाम अझं मदिउनि

येँ (नेपालभाषा टाइम्स)÷नेपाःया पर्यटन व्यवसाय विरुद्ध विश्वय् थीथी कथंया नकारात्मक प्रचार जुइगु क्रम अझ हे मदिउनि । खास यानाः हिमाली लागाय् ट्रेकिङ वनीपिं पर्यटकतय्त उद्धार यानागु धकाः नकली भ्वं दयेकाः सम्बन्धित देय्या बीमा कम्पनीपाखें ध्यबा असुल यायेगु ज्याय् नेपाःया ट्रेकिङ व्यवसायीत लगे जुयाच्वन धकाः पिहां वःगु चर्चा अझ नं क्वचाःगु मदुनि ।

छुं ई न्ह्यः तिनि नांजाःगु पत्रिकात ‘न्यूयोर्क टाइम्स’ व ‘वाशिङटन पोष्टं’ थ्व सम्बन्धी समाचार छापे यासें अज्याःगु ज्याय् ल्हाः दुपिंत कारवाही मयाः धकाः च्वया हःगु खः । उगु पत्रिकाय् च्वयातः कथं अज्याःगु ‘नकली उद्धार’ या ज्या याइपिं १७ गू ट्रेकिङ एजेन्सी, अस्पताल व हेलिकप्टर सेवायात कारवाही याःगु मदुनि ।

नेपाःया हिमाली लागाय् ट्रेकिङ वनीपिं पर्यटकतय्त नकली विरामी दयेकाः हेलिकप्टर व अस्पतालया समेत नकली भ्वं दयेकाः बीमा कम्पनीयात ठगे यायेगु ज्याय् ट्रेकिङ एजेन्सीत लगे जुयाच्वंगु दु धकाः छुं ई न्ह्यवंनिसें अन्तर्राष्ट्रिय ख्यलय् चर्चा जुयाच्वंगु खः ।

तर ट्रेकिङ एजेन्सीतय्गु संगठन टानं धाःसा नेपालय् अज्याःगु ज्या याःपिं फुकसित कारवाही यायेधुंकूगु व आः गनं नं अज्याःगु समस्या मदुगु दावी याःगु दु । थज्याःगु प्रचारं सन् २०२० य् २० लाख पर्यटक नेपाः दुकायेगु राष्ट्रिय अभियानयात लिच्वः लाकेफुगु खँ नं टानं धाःगु दु ।

सम्बन्धित बुखँ

LEAVE YOUR COMMENTS