बागमतिइ भाषाया कानून दयेकेगु तयारी

येँ (नेपालभाषा टाइम्स)(बागमति प्रदेश दुने नेपालभाषा व तामाङ भाषायात नं सरकारी ज्याखँया भाषा दयेकेगु लागिं बागमती प्रदेश सरकारं कानून दयेकेगु ज्या न्ह्यःने न्ह्याकूगु दु । उकिया लागिं विधेयक तयार यायेत गठन याःगु समितिइ विज्ञया रुपय् डा. ओमकारेश्वर श्रेष्ठ व अमृत योन्जनयात नियुक्त याःगु दु । समितिया संयोजक प्रदेशया न्याय मामिला सम्बन्धी मन्त्री कुमारी मोक्तान जुयादी ।

समितिपाखें विधेयक तयार यायेगु ज्या फयांफछि थ्वहे चैत महिना दुने क्वचायेकेगु तयारी जुयाच्वंगु खँ समितिइ विज्ञ कथं नियुक्त जुयादीम्ह डा. ओमकारेश्वर श्रेष्ठं कनादीगु दु ।

नेपालभाषा टाइम्स लिसे खँ ल्हासें वय्कलं धयादिल, ‘भाषा आयोगं हे भाषा सम्बन्धी कानूनया छगू मस्यौदा दयेकातःगु दु । व संघीय कानून जुल । आः उकिया हे आधारय् प्रदेशया छगू हे विधेयक तयार यायेगु ज्या थ्व समितिं याइ ।’

प्रदेश सरकारपाखें थ्व कानून तयार यायेधुनेवं हे बागमती प्रदेशय् तामाङ भाय् व नेपालभाषायात सरकारया थीथी निकायय् छ्यलेगु ज्या याइ ।

आः दयेकीगु कानूनं प्रदेश व स्थानीय तहलय् तकं थीथी भाषाया प्रज्ञा प्रतिष्ठान, बिस्कं भाषा आयोग आदि दयेकेगु लुखा चायेका बी । लिसें नेपालभाषा व तामाङ भाषायात प्रदेश दुनेया अदालत, शिक्षा, सरकारी ज्याकू आदि गन गन छ्यले फइ धइगु खँ नं निर्धारण याइ ।

भाषा आयोगं थीथी प्रदेशय् गन गन छु छु भाषायात सरकारी मान्यता बी माली धकाः सिफारिस सहितया प्रतिवेदन लःल्हाःगु खः । तर बागमति प्रदेश बाहेक मेगु प्रदेशतय्सं उकियात लागू याकेगु खँय् धाःसा उलि चिउताः तयाच्वंगु खने मदु । बागमती प्रदेशय् नं थीथी खलः पुचःया दबाब लिपा थ्व ज्या न्ह्याःगु खः ।

सम्बन्धित बुखँ

LEAVE YOUR COMMENTS