सनसिटी अपार्टमेन्टया मिजंयाके हाकनं कोरोना पुष्टि

येँ – येँया पेप्सिकोलाय् च्वंगु सनसिटी अपार्टमेन्टय् च्वंम्ह कोरोना संक्रमित जूम्ह मिजंयाके हाकनं कोरोना खनेदुगु दु । बेलायतं लिहां वःम्ह उम्ह मिजं व वया मांयात कोरोना जूगुलिं छुं न्हि न्ह्यव पाटन अस्पतालय् उपचार यानाः छेँय् लिहां वनेधुंकूगु खः । आः हाकनं टेस्ट याना स्वःबलय् मिजंम्हेसिके हाकनं कोरोना संक्रमण लिथ्वया वःगु खनेदुगु खः ।

वंगु वैशाख ११ गते कोरोना उपचार लिपा छेँय् लिहां वंम्ह उम्ह मिजंया स्वाब छवाः लिपा परीक्षण याःबलय् हाकनं संक्रमण खनेदुगु खः । वयात आः हाकनं पाटन अस्पतालय् हःगु दु ।

थुकिया लिसें नेपालय् हाकनं कोरोना लिहां वःपिं संक्रमितत ल्याः स्वम्ह थ्यंगु दु । मंगलवाः रौतहत व वीरगञ्जय् च्वंपिं निम्ह भारतीयतय्के नं हाकनं कोरोना खनेदुगु खः ।