एकेदेमिया विचाः मुँज्या

येँ- नेपालभाषा एकेदेमिं थः दुजः नांजाःम्ह कलाकारलिसें मूर्तिकार राजकुमार शाक्य व पार्षद् दुजः वरिष्ठ चित्रकारलिसें नेवाः संस्कृतिया अध्ययेता एकाराम सिंयात लुमंकल ।

जूम प्रविधिया माध्यमं जूगु विचाः मुँज्या एकेदेमिया चान्सलर चित्तरञ्जन नेपालीया सभापतित्वय् जूगु ख । सदस्य सचिव मल्ल के. सुन्दरं लसकुस यासे न्ह्याकादीगु ज्याझ्वलय् राजेश अवाले व रविन्द्र ताम्राकारं अन्तर्राष्ट्रिय जगतय् तकं नेपाःया नां तयेत सफल मूर्तिकारलिसें एकेदेमिया दुजः शाक्यया योगदान व उकिया थीथी पक्षयात कयाः नुगःखँ तयादीगु खः ।

ज्याझ्वलय् नवासें एकेदेमिया प्राज्ञ दुजः राजेश अवालें कलाकारलिसें मूर्तिकार शाक्य मचांनिसें हे लगनशील जुयाः थ्वज्या माज्याय् निपुण जुयादीगुलिं वय्कःया आधुनिक अरनिकोया संज्ञातकं बीगु याःगु खँ लुमंकादिल । भुटानय् ११५ फिट तःधिकःम्ह मूर्ति स्थापना यानाः थःगु ज्वःमदुगु कलाया नमूना न्ह्यब्वयादीम्ह कलाकार शाक्यं इच्छा याःगु आपालं म्हगस पूवंके मखंगु खँय् दुःख प्वंकादिल ।

ताम्राकार समाजया नायः रविन्द्रराज ताम्राकारं जर्मन व सांघाईलय् जूगु एक्सपोय् नेपाःपाखें कलाकारलिसें मूर्तिकार शाक्यया हे कला प्रदर्शन यायेगु ज्या जूगु लुमंकादिल । वय्कलं नेपाःया कलाकृतिया ख्यलय् छगू तःधंगु प्रदर्शनस्थल, तालिम केन्द्र, अनुसन्धान केन्द्रया रुपय् स्थापना यायेगु नेपाल आर्ट भिलेजयात पूर्णता बी मखंगु खँय् दुःख तायेकादिल ।

अथे हे राष्ट्रिय अभिलेखालयया निमित्त महानिर्देशक सौभाग्य प्रधानांगं एकेदेमिया पार्षद कलाकार एकाराम सिं छम्ह साधारणलिसें सकारात्मक सोच दुम्ह व्यक्तित्व जूगु खँ कनादिल । नेपाःया थीथी जातजाति, समुदायया जात्रा, पर्व, रहनसहन बारे दुग्यंक अध्ययन याना वयाच्वनादीम्हलिसें छुं गुगुं संघसंस्थया ध्वाँय्, लोगो च्वयादीबलय् उकियात जीवन्तता बीत स्वइम्ह कलाकार जूगु खँ धयादिल ।

नेपाल संवत्या प्रणेता शंखधर साख्वाःया किपा च्वये स्वयां न्ह्यः नं स्वदँ तक मदिक्क शंखधरया बारे अध्ययन यानादीगु वय्कलं कनादिल ।
ज्याझ्वलय् ज्यापु महागुथि नेपाःया न्वकु सन्तु महर्जन, नेवाः देय् दबूया नायः नरेश ताम्राकार, डब्ल्यूएनओया संस्थापक नायः डा. बालगोपाल श्रेष्ठ, पासा पुचः गुथि युकेया पुलांम्ह नायः संयुक्त श्रेष्ठ, अमेरिकाया सियाटलय् च्वना वयाच्वनादीम्ह भाषासेवी डा. सुभाषराम प्रजापति लगायतं मदुम्ह शाक्य व सिं मदुगु दुःखय् विचाः हायेकूसे वय्कःपिनिगु थीथी पक्षयात कयाः नुगःखँ धयादीगु खः ।