ने. सं. ११४३ ञलाथ्व चतुर्दशी -

विश्व रक्तदाता दिवस हन

येँ- दँय्दसं जुन १४ या न्हियात विश्व रक्तदाता दिवसया रुपय् हनेगु झ्वलय् थीथी चेतनामूलक ज्याझ्वःत जूगु दु । नेपाल रेडक्रस सोसाइटी, केन्द्रीय रक्तसञ्चार सेवापाखें विश्व रक्तदाता दिवसया लसताय् उकथं जनेचनामूलक ज्याझ्वः याःगु खः ।

‘हिदान यायेनु, संसारयात चलायमान दयेकेनु’ धइगु नारा बियाः विश्व रक्तदाता दिवस छन्हु न्ह्यः स्वद्वलं मल्याक हिदातातय्त सुभाय् सहितया सन्देश छ्वःगु खः । विश्व रक्तदाता दिवस छन्हु न्ह्यः भर्चुअल माध्यमं ग्वसाः ग्वःगु ज्याझ्वलय् नेपाल रेडक्रसया अध्यक्ष डा. नेत्र तिम्सिनां कोरोना संक्रमणया निगूगु लहरया महामारीं दकलय् अप्वः प्रभाव लाकूगु नेपालय् हिदातातय्सं मेपिनिगु जीवन रक्षाया निंतिं म्हिताच्वंगु भूमिकायात कयाः सम्मान प्वंकादिल ।

स्वास्थ्य तथा जनसंख्या मन्त्रालय, राष्ट्रिय जनस्वास्थ्य प्रयोगशाला (एनपीएचएल) या निर्देशक डा. रुणा झां हिया समुचित प्रयोग जुइमाः धइगु खँय् स्वास्थ्य तथा जनसंख्या मन्त्रालय, राष्ट्रिय जनस्वास्थ्य प्रयोगशाला (एनपीएचएल) सचेत दु धयादिल ।

ब्लड डोनर्स एशोसियसन नेपाल (ब्लोदान)या अध्यक्ष सानुबाबु प्रजापतिं स्वेच्छिक व अवैतनिक हिदाता अप्वयेकेत रेडक्रसया रक्तसंचार सेवायात ग्वाहालि यायेत थःपिनिगु संस्था न्ह्याबलें नं प्रतिवद्ध दु धयादिल ।

ज्याझ्वलय् १५२ क्वः हिदान यानादीधुंकूम्ह नीता घिराईया, ३५ दँ न्ह्यवंनिसें मदिक्क हिदान याना वयाच्वनादीम्ह अर्जुन मैनाली लगायतं हिदानया थीथी पक्षयात कयाः नुगःखँ तयादीगु खः ।
अथे हे ज्याझ्वलय् नेपाल रेडक्रस सोसाइटीया उपमहामन्त्री दीपेन्द्र ढकाल, कार्यकारी निर्देशक उमेश ढकाल, रक्तसञ्चार सेवाया निर्देशक दिव्यराज पौडेल व एनपीएचएलका वरिष्ठ प्याथोलोजिष्ट डा. रेखा मानन्धरं आम हिदातापिंत सुभाय् देछानादीगु खः ।

थ्व हे झ्वलय् विश्व रक्तदाता दिवसया लसताय् बागमति प्रदेश समितिया ग्वसालय् चिनाखँ कासा नं याःगु व दिवसया हे लसताय् देय्न्यंकं हिदान ज्याझ्वः नं जूगु केन्द्रीय रक्तसञ्चार सेवाया निर्देशक दिव्यराज पौडेलं जानकारी बियादीगु दु ।